Kaupapa: Ngā Manu Kōrero

He aha kei mua mā ngā kairaranga kōrero wāhine?

Te Kuru o te Marama Dewes
  • Te Tai Rāwhiti

Hei tā ngā kaiwhakawā Manu Kōrero ā-motu, he papa haratau e eke ai ngā wāhine ki ngā turanga kaiarahi.

Ko Ngā Manu Kōrero he wāhi haumaru e whanake ai wāhine i roto i ngā mahi tuku kōrero, koia ko tā Te Ataakura Pewhairangi.

“Ko ngā tāne anake e kawe ana i ngā whaikōrero nō reira tērā pea he wero a ngā tau e tū mai nei ka kite pea i roto i ngā kapa o te motu te tū a te wahine ki te whaikōrero te rere rānei o te reo o ngā wāhine,” te kī a Te Ataakura Pewhairangi.

He toa ō mua, he kaiwhakawā ō nāianei, koia ko tā Te Ataakura Pewhairangi e mea ana nā te whakataetae nei ia tū pakari ai.

“Nā te Manu Kōrero i puta ai au ki te ao, nā te Manu Kōrero i tangata whenua ai au i tōku ao Māori koinei te tūāpapa mō ngā rangatahi ka puta ana ki te ao,” te kī a Pewhairangi.

Hei tāna anō, i roto i te whakataetae Manu Kōrero nei he tokomaha ngā kaikōrero wāhine ki ngā reanga taina, engari kāre i pērā rawa te maha ki ngā reanga tuakana.

“I pēnei ai ki taku mōhio i te mea kāre he nui ngā kaiako wāhine kei roto i ngā kura tuarua e akiaki ana i ngā wāhine ki te tū ki te whaikōrero," tā Pewhairangi.

He kaiwhakawā reo Pākehā a Dale Takitimu hei tāna, kei tauamata kē tēnei o ngā whakatipuranga, he tohu nā ngā mahi a te hunga pērā kia Kāterina Mataira.

“Te tauira o ngā hua mēnā ka whakatipu i ngā tamariki i roto i ō rātau tikanga i roto i ō rātau reo, ko tēnei te tino hua o Te Aho Matua tērā taonga i waihotia a Te Heikoko (Maitaira) mō te katoa,” te kī a Takitimu.

He taonga motuhake ka whakawhiwhia ki ngā wāhine ka eke.