Kaupapa: Youth

He $8m e āpitihia ana mō te kaupapa Taiohi Ararau

  • Tāmaki Makaurau

E waru miriona tāra anō e āpitihia ana e te kāwanatanga mō tana kaupapa here hōu, mō 'Taiohi Ararau', ka awhi i ngā rangatahi ki te whai i wā rātou pepa ōkawa. Hei tā te kai-hāpai rangatahi a Aroha Mane, he maha ngā rangatahi kua whāngai ki whānau kē atu nō reira kare o rātou pepa whai mana.

Tekau mā ono nga tau o Te Auta Mc Phee, ā kare ōna pepa ōkawa. Hei tāna, nā tōna noho tahi me tōna koka, matua kēkē hoki, tē taea te whai i ōna pepa ōkawa, kei tētahi pea o ōna mātua.

Ko te waru miriona tāra tēra kua tāpiri atu ki te āwhina i nga rangatahi pēra i Te Auta ki te whiwhi i tana uruwhenua, pepa whānautanga, raihana taraiwa anō hoki.

Hei tā Aroha Mane, ko tētahi o ngā raru ko te whai i ngā pepa ōkawa mō te hunga rangatahi kia ahei rātou ki te tono mō ngā karahipi whare wānanga.

He mea nui te whai i ngā pepa ōkawa hei tā Te Auta, kia taea e ia te whai raihana, te whai mahi, arā noa atu.

E ai ki a Aroha ka mahi tahi ia ki nga rangatahi e mate nui ana.

I te nuinga o te wā, hei tāna, ka noho ngā rangatahi nei ki te taha o ngā whanaunga, kua ngaro hoki ngā pepa ōkawa. He nui rānei te utu mā ētahi ki te tono mō ngā pepa hōu.

E ai ki te tari o te Minita Whanaketanga Māori, kare ano rātou kia whakatau me pēhea, āhea hoki tēnei pūtea e wātea ai.