Hāpai Te Hauora gets behind “No sugar drinks” campaign

  • Tāmaki Makaurau

Ko te ratonga hauora Māori tūmatanui ki Tāmaki, ko Hāpai Te Hauora kei te karanga atu ki ngā mana, ā-rohe mai, ā-motu mai hoki, ki te tautoko i ngā kaupapa i te hapori e rongoātia ai ngā pānga kino o te wara kai huka. Ko te wero nui, e ai ki a Tūnuiārangi McLean, ko te whai wā ki ngā mahi whakaheke i te hunga e mate mōmona ana.

E kaha tautoko ana a Hāpai Te Hauora i ngā rōpū kei te kōkiri kaupapa hei aukati i tā te huka maukino i ōna tāngata.

“Te tino wero kia whakakorehia ngā wairekareka, te putea kei te haere ki ngā kampune nui nei ko tā mātou e kī ana, kua rahi, kua rahi tērā āhuatanga, me whakamutu tērā āhuatanga.”

E hono atu ana a Hāpai Te Hauora ki te huinga FIZZ "Toward a Sugary Drink Free Aotearoa" mā ngā tākuta me ngā kairangahau hauora, e hiahia ana kia aukati te hokonga o ngā waireka.

“Iāianei kua puta ngā rangahau e kī ana kāore te inu wairekareka te pai mō ō tātou whānau, hapū, iwi i runga anō te mea, ka whakamomonahia rātou.”

Mai i te tau rua mano tekau mā rua kua kōkiri kaupapa a Hāpai Te Hauora mō te wai huka kore, whērā i ngā kaupapa hapori nui i te whakataetae mahi ā-rēhia a ngā kura taiohi ASB i Tāmaki Makaurau, i tērā tau.

“Kua eke mātou ki te reanga ki te whakapā atu ki roto i ngā ture o te kāwanatanga, ko te kāwanatanga ā motu mō ngā ture i ngā kaunihera ā rohe nei.  Kua eke ki tērā reanga ināianei ki te akiaki i a mātou ki te aroha mai, ki te hiki i tēnei o ngā momo kaupapa ki te ārai atu ō tātou whānau, ō tātou tāngata e momona haere ana i runga i te inu i te wai rekareka.”

Hei tuatahinga mō Aotearoa, kua whakarewa he tohu "wai reka kore" i te huinga o FIZZ, hei whakaoho i te tangata ki ngā tūkinotanga o te huka i roto i ngā kai.

Tuaritia: