Everyone can do the Mahuru Māori challenge

  • Tāmaki Makaurau

Ko Jennifer Ward-Lealand kei te whakahau i ngā iwi katoa kia kōrero i te reo Māori i te marama o Mahuru.  Ko te kaiwhakaari rongonui nei tētahi o ngā tini tāngata e piri atu ana ki te wero pae pāho i tīmata i te rangi nei.

E tahuri ana tēnei whetū ā kiriata, pouaka whakaata anō hoki ki te whakaari i tana reo Māori mō te Mahuru Māori.

“Kia kōrerotia te reo, kia tangata whenua ai te reo, kia Māori ai te reo, kia rangona puta noa i te motu, nō te mea nō Aotearoa tātou katoa,” hei tā Ward-Lealand.

E rua ngā taumata hou kua whakaurua e Paraone Gloyne o Te Wānanga o Aotearoa, ko te kōrero reo Māori anake mō te kotahi rā o ia wiki tēnei me te kōrero reo Māori anake mō te kotahi wiki o te marama rānei.

“Mēnā ka tū he taumata anō nē, e rua, e toru, kotahi noaiho ngā haora, ia te wā, tērā pea ka tāea te katoa,” hei tā Ward-Lealand.

Hei tā Gloyne, “Whakarite i a koe, whakamōhiotia hoki ō hoa, ō whanaunga, tō wāhi mahi kia mārama ai rātou ki tāu e mahi nei kia rite ai rātou ki te tautoko i a koe.  Ko te whainga kia whakawhitiwhiti kōrero me ētehi.”

Tokotoru noa iho ngā tāngata i hiki te mānuka i te orokohanga o te kaupapa nei e rua tau ki muri.  I tēnei tau, e tata atu ana ki te kotahi rau rua tekau te hunga ngākau minamina kua rēhitatia.

“I roto i ngā tau kua papare ētehi i au, ehara tērā i te whainga, ki te whakamataku i te tangata engari ko tēnei kaupapa, he whakahihiri i te tangata ki te kōrero Māori,” hei tā Gloyne.

E tumanako nui ana a Jennifer ka puawai tana reo ki taumata kē tae mai te mutunga o Mahuru Māori.

Tuaritia: