Kaupapa: 28th Māori Battalion

East Coast mourn the loss of Nolan Raihania

  • Te Tai Rāwhiti

E hia kē nei hoki ōna hoiho mo ngā reihi hoiho te take.  E rua o ōna hoiho i eke panuku ki ētahi reihi matua, ko Hikohiko rāua ko Marotiri a rāua ingoa.  I timata hoki ia i tētahi rōpū waiata e kīia ana ko te Four Notes, i horapa tō rātou motuhake i Te Waipounamu.

Nolan Tariho Raihania

I whānau mai ia i te 16 o Whiringa a Rangi i te tau 1926 i Muriwai. I whakatipuria ia e tōna tipuna kuia a Arawhita Merania Pohatu ki tā rātou kāinga kua karangahia e te whānau ko te Palace.

I kuraina ia ki Muriwai Native School i mua i tana urunga atu ki te kareti o Te Aute i te tau 1940. I a ia i Te Aute i rongo kōrero ia mō te pakanga nui o te ao, ki reira i whakatauria ia kia uru atu ki te ope tauā o Aotearoa.

Na konā i uru atu ia ki te Home Guard i te tau 1943, whai muri atu i tēnā i uru atu ki te ope tauā o Aotearoa ahakoa 17 noa tana pakeke. I whakangungua ia ki Linton Army Camp tōmua i tana haerea ki Itaria ko Sir John the Major tana āpiha.

I hoki mai ia nō te pakanga i te tau 1946 hai kāmura i mua i tana mārena atu ki tana hoa rangatira a Ana Hineahuarangi Te Oparani Te Ataiti Rangiriri Raihania, a Gin rānei i te tau 1949.

Nō muri tata iho i tērā i whānau mai tā rāua mataamua a Hine, ko Iritana i whai atu kātahi ka puta ko Kumeroa.

I te tau 1956 i whati atu a Nolan ki Te Waipounamu ki te kuti hipi, i te tau 1958 i whakatauria kia hūnuku atu tana whānau ki reira, noho ai ki Mataura.

Ki reira i whānau mai tana ure tārewa a Wirihana, ko Te Ihi i whai kātahi ko Herewini, ko Nolan, ko Na ā ko te pōtiki o te whānau ko Keriana.

30 tau a Nolan e mahi ana hai kaikuti hipi i Mataura, ka mutu ko tana whānau tana kēnge kuti hipi.

I taua wā hoki i ārahi ia i te karapu Māori o Mataura.  Ko rātou tēnā i kohi pūtea mo te Maori Education Foundation i puta hoki ki ngā whakataetae kapa haka huri noa i te motu.

E hia kē nei hoki ōna hoiho mo ngā reihi hoiho te take.  E rua o ōna hoiho i eke panuku ki ētahi reihi matua, ko Hikohiko rāua ko Marotiri a rāua ingoa.  I timata hoki ia i tētahi rōpū waiata e kīia ana ko te Four Notes, i horapa tō rātou motuhake i Te Waipounamu.

Nō te tau 1968 tae noa ki te tau 1978 i noho ia hai mema mo te kaunihera o Mataura i mua i tana whakaoati hai Justice of the Peace.

I te tau 1984 i whakatūria e ia te Marae o Mataura e kīia ana ko Te Hono o Te Ika a Maui ki Ngai Tahu.  Ki konei hoki i whakaaturia tuatahitia te waiata rongonui a Ngoi Pewhairangi e kīia ana ko E Tū Tautoko Noa.

I te tau i 60 tana pakeke i whakatauria rāua tahi ko tana hoa rangatira kia hoki atu ki Tokomaru Bay mō te tūpono ka ritaia rāua, engari kāore i pērā rawa.

I tana hokinga ki te kāinga i whakatika ia i te tuanui o te marae o Te Hono ki Rarototanga kātahi ka whakaritea ia kia hanga i te wharekai o Waiparapara Marae. Katoa o ēnei mahi āna kāore ia i whakaaetia kia utua.  Nō tana hokinga mai i te pakanga o te ao i whiwhi ia i tana tohu waihanga whare. 

I tana hokinga ki te kāinga i whawhai ia i tētahi kēhi whenua kia hoki atu te whenua o tōna hoa rangatira ki a ia anō.  I riro i a ia te whenua kātahi ka tohungia ia e te iwi kia whakahaerehia te whenua.  Na kona i tipu mai te paratē kānga, paratē paukena tuatahi ki roto i te Tairāwhiti.

Ko ia hoki tēnā i āwhina ki te whakatika i te marae o Waiparapara, i kuhu atu ia ki Te Rūnanga o Ngāti Porou hai tarati kātahi ka heke ia i taua tūranga nō muri atu i te hainatanga o te kokoraho.  Ko ia tētahi mema o te karapu hākinakina i Tokomaru, te RSA i Tūranga hoki.

I te tau 2008 i tohua ia hai perehitīni matua mō te hokowhitu a Tū, ka mutu kei te karangahia tonutia ia hai perehetīni e te tini ahakoa i kapi te rōpū i te tau 2012.

I te tau 2011 i tohua a Nolan hai āpiha mo te New Zealand Order of Merit ā i te tau 2014 i tana taenga atu ki te whakamaharatanga o te pakanga o Cassino i Itaria i tūtaki atu ia ki a Pōpa Francis rāua ko Prince Harry.

Ki roto i te wā ko tana aroha ki tana whānau te mātaamua o ngā tini kaupapa ōna.  Kāore he momo kē atu i a ia mo te puku mahi, ko tana kura huna i puta ai te ihu kia oho, kia puta te tangata ki te mahi ia rā.  He tohunga manu kōrero, reo Māori mai, Pākeha mai rānei.  Ahakoa 60 tana pakeke i kuti hipi tonu ia, i mahia tonutia e ia te whenua tae noa ki tēnei rā.  He mātanga pukenga rau, kāmura mai, kaikuti hipi mai, kaihaka mai, rangatira mai, ihopūmanawa mai, ika ā whiro mai.  Kāore he tuahangata e pēnei ana te momo, ka mokemoke tātou te iwi Māori ki a ia.

I te tōnga o te rā ki te aranga mai o te rā, ka maumahara tonu tātou ki a ia, ki a koe e te Pāpā, Nolan Tariho Raihania

Tuaritia: