E whawhai tonu ana a Patuharakeke mo a rātou whenua

Dean Nathan
  • Te Tai Tokerau

Kua eke te whawhai a Patuharakeke mo ōna whenua tūpuna ki tetahi taumata ano no te huinga o ngā uri ki Takahiwai i ngā ra nei. Ko tōna tikanga he whenua i whakatahahia mo te whakatatūranga o ngā kereme tiriti engari kei te hokona kē ki tāwahi.

Kahore e tawhiti ana i te whenua toru rau eka e hokohia ana te kamupene o Mighty River Power e hui ana ngā uri o Te Patuharakeke ki te rapu ara hei ārai atu i tēnā mahi.

Ko tā Jared Pitman, “ko te ahua nei koia tēna te hiahia a te karauna, ehara me kī no matou o Te Patuharakeke anake ā ka pā atu tēna ahuatanga ki ngā hapū katoa o Te Taitokerau ae e tika ana tenei.”

Katahi ano ka timata ngā kereme o Patuharakeke te rongohia e te taraipiunara o Waitangi, kei te hokohoko i te toenga o ngā whenua tupuna kua oti noa te tohu hei whakahoki ki te iwi.

Ko tā Ani Pitman, “He wā pouri mo matou ngā mokopuna o ngā tupuna e whai ake he tika na te karauna ma ngā hē ngā raupatu o o mātou whenua.”

Neke atu i te rima mano eka katoa o Poupouwhenua i raupatutia e te karauna i ngā tupuna o Patuharakeke.  Ko ētahi whenua pērā i te papa reihi hoiho o Ruakaka ano nei i tohua ai hei whakahoki ma te iwi. Engari kua hokona kē ki ngā hoa o te kawana mo te utu pihikete noa iho nei.

Na ko te whenua kei muri ko te whenua mutunga o te takiwā e taea ai te whakahoki ma te iwi.

Ko te kawana te kaipuriti i te nuinga o ngā pānga ki te kamupene o Mighty River Power me te mohio a te iwi ki raro i te ture o te wā, kei te herea tonu te oati o te Tiriti o Waitangi.

Ko tā Jared Pitman, “Kia mau ai te whenua. Kia mau ai te whenua ma ngā whakatupuranga kahore ano i eke mai.  A, ko te mea nui mo mātou inaianei kia huitahi kia piritahi ā kia mahitahi kia taea e tatou ki te mau ano i o tatou nei whenua.”

Taihoa ake nei e timata ai ngā mahi a te iwi hei kōkiri i tēnei kaupapa.