E whawhai tonu ana ngā hōia morehu hakoa kua oti kē ngā pakanga ā-ao

Dean Nathan
  • Te Tai Tokerau

Kua mutu noa ngā pakanga engari kei te haere tonu te whawhai.  Koinei te āhuatanga o tētahi hui a ngā mōrehu hōia o Ngāpuhi nui tonu hei wānanga i te whānuitanga o ngā nawe he kōkiritanga mā rātou ki te aroaro o te Taraipiunara o Waitangi.

Ko te whakapae nā te Kāwana anō i tūkino ngā tikanga a ngā hōia me ngā heramana ki raro i te Tiriti o Waitangi i a rātou e ngaro ana ki tāwāhi.

Hei tā Pita Tipene, "E mōhio ana ngā hōia i haere rātou ki te pakanga mō te Kīngi me te Haki, heoi haere atu rātou ki tāwāhi ko ētahi e rāwekewekengia ana o rātou wheuna i te kāinga."

Hei tāna anō, "Ko ētahi hoki i hoki mai i te mutunga o te pakanga kua hokona kē ngā whenua, ētahi i hōatungia ētahi whenua ki ngā hōia Pākehā; ko ngā hōia Māori kahore kē he aha, nō reira me tirotiro te hohonutanga o ērā kaupapa."

Kahore hoki i tua atu i te whare o Tūmatauenga hei hautū i tēnei wānanga kia kōkiri ngātahitia ngā take katoa a ngā mōrehu hōia ki mua i te Taraipiunara hei te tau hōu, ā tae noa ki ngā take a ngā whānau me ngā uri kei te pokea tonu e ngā kino o te pakanga.