E whakawhānui ana te TriMāori nā te tokomaha e muia ana ki Karāpiro

By Tamati Tiananga
  • Waikato/Te Waiariki

Ko te whainga o te tauwhāinga Tri Māori rua mano ngahuru mā whā hei whakakotahi i ngā whānau ki ngā āhuatanga kori tinana ka mutu, i muia te roto o Karāpiro i te mano o tangata ki te tautoko i te kaupapa nei.   

He rā whakanui, he rā whakatairanga i te kaupapa Tri Māori i tū ki Kēmureti. 

Hei tā Tama Potaka, “Ko te mea nui kia haere pai mai te tangata kia hoki ora atu ki te kāinga, kia hari te tangata, koirā te kaupapa matua.”

Rangatahi mai, pakeke mai i takahia ngā rohi

E ai ki a Te Mauri Apiata, “He pai ki te kite ake i ngā whānau nei e tautoko ana i te kaupapa ki te whakapakari i te hauora me te whakawhanaungatanga ēra āhuatanga katoa.”

Neke atu i te kotahi mano tāngata no ngā tōpito o te motu i uru atu ki te tauwhāinga nei.

Ki tā Potaka, “Ahakoa e uru ana ratau ki roto i ngā hakinakina, e tautoko ana rānei, kei te menemene mai te kanohi kei te ata tautoko i ngā kaihākinakina, me te whakarongo ki ngā waiata, te āta titiro ki te moana ki te roto o Karāpiro.”

Ko ētahi i whai wā ki te kaukau, ko ētehi i ngahau tahi.

Hei tā te kaiwhakahaere a Tama Potaka, ko te Tri Māori he momo kaupapa hauora

Ko Potaka tērā e mea ana, “Ko te hauora te ia o te oranga tangata ki te hiahia uru mai koe ki ēnei momo hākinakina, haere whaia, kaua e mate wheke engari me mate ururoa.”

Ka mutu he rā mīharo rawa mō te katoa.

E ai ki a Potaka, “He kaupapa nui tēnei kei te haere ake, engari ko te mea nui kia haere te hunga tangata, ki te hoki ora atu ki te kāinga.”

Tuaritia: