Kaupapa: Koroneihana

E whakatikatika ana te marae o Tūrangawaewae ki Ngāruawāhia mō kōroneihana tuaiwa o Kīngi Tuheitia

Te Kāea
  • Waikato/Te Waiariki

E whakatikatika ana te marae o te motu a Tūrangawaewae ki Ngāruawāhia mō te ngerongero tāngata ka taetae mai i runga i te karanga o te kōroneihana tuaiwa o Te Kīngi Māori a Tuheitia.

Pukumahi ana te haukainga ki te whakariterite mō ngā rangi e rima kei mua i te aroaro.

Ki te tika ngā mahi ki muri, ka tika ngā mahi ki mua.

Hei tā Rose Whānga, “Ko taku mahi he kaitiaki i ngā tari, me te whakahaere in ngā āpiha hauora ka tau mai i ēnei rā whakatā, i tēnei wiki.”

E ai ki a Kawe Nikora, “Ko taku tino mahi mō tēnei wā, ko te manāki tangata, ahakoa te aha ko taku mahi manāki tangata.”

Koia nei te tau tuaiwa o ngā whakanui i te Koroneihana mō Tuheitia, me te aha, he maha ngā tūmanako wawata a ngā kaiwhakahaere me a rātou kaimahi.

Ki tā Nikora, “Ko taku hiahia mō te wā e heke mai nei, te kotahitanga o te whānau, o te iwi Māori, ahakoa tewhea iwi, ko te kotahitanga, ko te aroha,  ko ngā ture, ko te tikanga.”

Ia tau ia tau mō ngā tau whitu tekau mā whā, kua tū tēnei kaupapa ki Tūrangawaewae, ā, kua waia kē te haukāinga ki te whakatū, ki te whakarite ahakoa ka tipu tonu ka tipu tonu.

E ai ki a Rangimarie Mahuta, “Kāre pea he uauatanga, ia te tau ia te tau he wero i roto i ngā mahi, i roto i te whakahaere me ōna whakaritenga, me pērā pea taku kōrero.”

Āpōpō ka rere ngā roimata ka heke te hūpē mō te kawe mate o Waikato Tainui te kaupapa, ka hoki mai ahau ki te kawe i ngā kōrero o te rā.