Kaupapa: Tūhoe

E whakarite ana a Tūhoe mō te hokinga nui

  • Waikato/Te Waiariki

Nō tēnei ahiahi tonu, ka tīmata ngā uri o Tūhoe ki te taki hoki atu ki te whakakā i ngā ahi o te wā kāinga mō te tīmatatanga o te hui ahurei nui o te iwi. 

Kei taumata kē te iwi e tau ana i tēnei wā, nā runga i te kōkiri whakamua o tā rātou kereme tiriti. 

Ā, na te whakatūnga o tētahi whare hōu, he $15mil te utu, tērā pea e tō ana te rā ki Ruatoki mō te whakatū i te ahurei.

Koinei te otitanga o ngā mahi i tēnei hui ahurei o Ngāi Tūhoe, he hui kua nuku atu i te whā tekau tau e whakahaerengia ana.

E whakapae ana, kō atu i te tekau mano tāngata ka tae mai, he wāhi hoki tēnei hei whakaputa kōrero mō ngā kaupapa e rere ana ki roto o Tūhoe, ko tētahi e hāngai ana ki te kereme whakatau, tērā i noho ai a Tūhoe me te karauna hei whakahaere i Te Urewera.

I tēnei wā kei te whakatūhia e Tūhoe tōna tari ki Taneatua, $15mil te utu, he tohu pea tēnei ki te iwi, ka mutu te whakahaere i te ahurei ki Ruatoki.

Ka timata te hui ahurei a Ngāi Tūhoe āpōpō, ka riro mā ngā tamariki hei whakarewa i te hui hei te iwa karaka i te ata.