Kaupapa: Education

E whakarite ana a Ngā Tapuwae ki te poroporoāki i tā rātou mareikura

Piripi Taylor
  • Tāmaki Makaurau

E whārikitia ana Te Whare Wānanga Pupuri Kōrero o Ngā Tapuwae, i te tonga o Tāmaki Makaurau mō te ūnga atu o te mōtoi kahurangi, o Pani Takawhenua Stirling, ki reira tangihia ai. E whitu tekau mā whitu tau te pakeke o tēnei pou whakairo i te mātauranga māori nō Ngāti Porou kua hinga nei.

Ko Pani rāua ko tōna hoa rangatira, ko Te Keepa Stirling ētahi o ngā kai-whakaū i Te Kura Māori o Ngā Tapuwae, i te rāwhiti o Māngere. Ko tā rāua tamaahine, ko Arihia te tūmuaki o te wā.

Hei te tekau karaka āpōpō ka tae atu te tāonga o mate ki Te Kura Māori o Ngā Tapuwae, ā ka takoto ki reira mō te pō kotahi i mua i tana hekenga atu ki Wairuru Marae, i Raukokore ā te Rātapu.

Hei te tekau mā tahi karaka i te ata o te Tūrei ngā karakia mō tōna uhunga, ā, ka nehua ki te taha o āna tama a Hori, a Te Keepa me Hamiora i te urupa o Moutara.