Kaupapa: Tūhoe

E whakareri ana a Waiōhau Marae kia tū te wharekai hōu

Mere McLean
  • Waikato/Te Waiariki

I tū te karakia whakamoe i te whare kai o Waiōhau Marae i tēnei ata kia turakinahia te whare, kia tū he whare hōu anō.  Neke atu i te rima tekau tāngata i tae ki te karakia ki roto o Waiōhau tonu, he hapori pā tata ki Whakatāne.  

He mahi hītori tēnei mō te hapori o Waiōhau i a rātou e kati ana i to rātou whare kai kia rite mo ngā mahi hei whakatū i tētahi whare hōu anō.  

Hei tā Peter Te Atarau White (Ngāi Tūhoe), "Tino aroha ahau mō tēnei whare, koroua whare kei te wāwāhia, heoi anō ko te tau hōu tēnei e haere mai ana mō a mātou tamariki, ō-mua, ā, kei te hara mai tonu."

He mea whakatū tēnei whare hei tohu mahara ki ngā hoia i haere ki te pakanga tuarua o te ao, ko te īngoa i tapa ki runga i te whare ko Te Wao nui a Tāne, he whare kua whāngai i te tini, te mano kua tae mai ki Waiōhau Marae.   

Ko te kii a Rita Tupe (Ngāi Tūhoe), "I te wā i au e pakupaku tonu ana kei te maumahara tonu ahau ki ngā akoranga o a mātou kuia, i o mātou koroua, ā, me pēhea te whakahaere o roto i te kīhini, me pēhea te whakahaere i roto i te whare tonu, me pēhea te whakahaere i te marae katoa."

Kua roa ngā whānau o te marae e kohi pūtea ana i runga i te whāinga kia whakatū i tētahi whare kai anō, i te tau ka huri ko te whakataetae whakangau o te marae o Waiōhau i hapai kia eke te pūtea ki te whā rau mano, mā ngā pūtea a ngā Lotteries i eke anō.   

"Ko te mahi a ngā kaitiaki ki te whāwhā haere ki te taha o ngā pūtea, ā, ki te whakatū anō he whare hōu mā mātou," te kii a Tupe.

Ka turakina te whare i te roanga ake o tēnei wiki.