Kaupapa: Weather

E whakarere atu ana ētahi o ngā iwi o Vanuatu i ō rātou kainga i mua i a Huripari Pam

Te Kāea
  • Te Tai Rāwhiti

E whakarere atu ana ētahi o ngā iwi o Vanuatu i ō rātou kainga i mua i te ūnga atu o Huripari Pam ki a rātou.  E whakapaetia ana, ko te āwha nunui kē tēnei kua kitea i ngā tau, ā kei te rere hoki ngā whakatūpato ki ngā rohe i Aotearoa nei.

Heoi nā te piki haere o te hau i Vanuatu, kua whakarere ētahi o ngā kainoho ki wāhi kē, engari anō ētahi atu, ka noho pū kē mō te roanga atu o te pō.

E whakatūpato ana ngā āpiha i ngā iwi o Aotearoa, otirā o Tūranga nui a Kiwa kia mataara.

E ai ki a Erana Reedy, “I haere ahau ki Bunnings i Tūranga ki te hoko i tētahi mīhini hei tunutunu kai, ētahi pātara wai, ēra āhuatanga.  Ā, kua rite te reo irirangi mīhini whakahiko i te teihana, kei weto te hiko a ka taea e mātou te whakapāho.”

Ā, ko te āki a Te Rākau Whakamarumaru ki ngā kāinga o Te Tai Rāwhiti kia rite.

Hei tā Reedy, “I te ata nei i kōrero tā mātou tangata ki te Rākau Whakamarumaru, ko ana kōrero i tēnei wā ka tae mai te awhā ki te Tai Rāwhiti hei te ahiahi o te Rātapu.  Nāreira kua rite mātou ngā whānau ki te whakariterite.”

Kei te reanga tuarima te pākaha o te āwha, koia te taumata kaha rawa.  Ā, kua eke te hau awhio ki te rua rau rima tekau te pākaha.

Heoi anō kāre he āwangawanga ki ngā kai-whakahaere o te whakataetae hākinakina o Ultimate Waterman ka tū ki Tāmaki Makaurau apopo, hei tā rātou he huarere pai kē e matapaetia ana.

Ko te hiahia a Te Rākau Whakamarumaru kia kaha tātou te whakarongo tonu ki ngā karere matua mā runga reo irirangi.