E whakarauika atu ana ngā mana nui o te ao ki Ahitereiria mō te hui G20

  • Ahitereiria

E whakarauika atu ana ngā mana nui o te ao, pēnei me perehetini Barack Obama o Amerika rāua ko perehetini Vladimir Putin o Rūhia, ki Te Papakanui a Māui. 

Hei āpōpō ki Piripane tīmata ai te hui nui mō ngā whenua ōhanga nui o te ao, e kīa ana ko G20, ā, e whakamahia ana te atamira rā e te iwi moemoeā ki te whakapuaki i o rātou nawe.

E kīa ana ko te ahi tēnei o te mana motuhake, ā, tūturu e manawa wera ana te iwi moemoeā.

E ai ki te rōpū nei ko te hui o ngā mana nui, he hui e takahi ana i a rātou te iwi taketake.  Inā he hui ōhanga e hāngai nui ana ki ngā rawa o te whenua, he rawa kāore i tukua noa engari ke i raupatuhia.

Inā te maha o ngā mana nui ka tae mai, he maha hoki ngā pirihimana.  Ā, e ai ki te rōpū porotū kua ngana ngā pirihimana ki te hunuku i a rātou, ka mutu, kei te rongo te iwi i te mataku.

Tūturu he taumaha te whanaungatanga i waenga i ngā taha e rua.  Otirā, ko te tokomaha o Ngāi Moemoeā e mate ana i rō whare pirihimana tētahi take nui e porotēhingia ana.

Kāti, ahakoa kapi ai te hui hei tēnei Rātapu, tūturu, ka mumura tonu ko te ahi.