E whakanui ana te hāhi Ringatū i ōna tau 150

Aroha Treacher
  • Te Tai Rāwhiti

Muia ana te marae o Rangiwaho e te tini ngerongero kia whakanui i te kōtahi rau rima tekau tau e haere ana te Hāhi Ringatū, he hāhi Māori nei i whakatūria e te poropiti Te Kooti.

"Koinei te marae hei whakanui tā tātou kaupapa, koinei pea te marae e ahua pātata atu ki Whareongaonga te whenua i ū mai ai Te Kooti Arikirangi Teturuki i ngā 150 ki muri," tā Whitiaua Ropitini.

I pāhiko aia me ōna kaitaunaki rua rau iwa tekau mā waru, mai i taua wā kei te haere tonu te hāhi i ēnei wā.

"Whakahoki o tātou mahara ki o tātou kuia koroua te whakapono o tātou koroua i whānau mai i roto i te pōkaikaha i roto i te whiu i roto i ngā whakamātautau i roto i ngā pehitanga kia puawai ko tēnei whakapono ko te hāhi ringatū ko tātou tēnei."

"He haahi Māori tēnei koinei te rā me kī tōna wairua hei kawe i a tātou i roto i ngā rā e tū mai nei," tā Wirangi Pera, pou tikanga o te hāhi Ringatū.

"Ko te titiro i tēnei wā he aha pae tawhiti kei mua i te aroaro te āhua o te hāhi te hanga o te hāhi ngā hangarau o te hāhi ngā mea hōu o te hāhi koira te mea nui te whainga nui," tā Ropitini.

I tau mai ngā tini ngerongero nō ngā hau e whā hei mihi, hei tautoko, hei whakamauhara i tēnei rā whakahirahira.