Kaupapa: Entertainment

E whakanui ana ētahi tauira i te mana o Matariki - Pūrongo Motuhake

  • Tāmaki Makaurau

Tua atu i ngā wānanga mo Matariki, ngā korero hītori me ngā huihuinga ā whanau, tēra etahi tauira mai i Te Wānanga Takiura o Ngā Kura kaupapa Māori o Tāmaki Makaurau, e whakapuaki nei i ngā mahinga toi whakaari, hei ako, hei tohutohu i te tino pūtake o Matariki.

Kei waenga i ngā tauira ko etahi atu iwi, e whai ana i te reo, e rapu ana i ngā tikanga, e kapo ana i ngā tohutohu ka whāngaitia kia ratou i tēnei wānanga. Na reira ko Matariki tēra e whakakotahi ana i ngā iwi, koia tonu tetahi o ngā tino hua o te tau hou, ko te whakawhanaungatanga.

Hei tā Ropata Pollock, “He Pākehā ahau, na reira kaore au i mohio mō te kaupapa o Matariki, engari inaianei tino pai taku mohio mō tēnei kaupapa, māku ko Matariki he wā tino pai mō te iwi Māori, me te iwi Pākehā hoki.”

Hei tā Carmel Skeaff, “Na te mea i noho ahau ki Tāmaki Makaurau, i noho ahau i Aotearoa i ngā wā katoa, ko taku whakāro te wā o Matariki te whai tikanga.”

Ahakoa mīharo ana te mātakitaki i ngā mahi whakaharikoakoa, whakakatakata hoki, e mārama ana ngā tauira, he tino whakamātautau tonu tēnei, ki mua i o rātou nei kaiako.

Tūturu kua tae mai a Matariki, me maumahara kia rātou kua mene atu ki te pō i roto i te tau kua hipa, he wā hauhake i ngā kai, me te ruku i ngā rawa a Tangaroa, me kohia ngā manu, katahi nei ka whakakīhia te pātaka kai, kua tae mai te wā mo te waiata, te kanikani, me te hākari.