E whakamana ana a Ngāti Maniapoto i a rātou ano

Wikitōria Day
  • Waikato/Te Waiariki

Nō ngā rangi whakatā nei whakarewahia ai tētahi kaupapa hōu i tū ki ngā rekereke o te maunga o Kahuwera, ki roto o Ngāti Maniapoto. Ko te huihuinga kapa haka e kiia nei ko Te Nehenehenui tērā i whakaemi mai ai i ngā uri huhua o te iwi, ā, i kōrero tahi tā mātau karere a Wikitōria Day ki a rātau, mō tēnei rangi whakahirahira.

Te Piopiotanga o Te Rīwai. Te wāhi i whakarewa ai te kaupapa hōu. He kaupapa i hua mai i Te Mahere Rautaki Reo o Te Nehenehenui kia tū mai ai he tauwhāinga haka mō Maniapoto, nā Maniapoto.

Ko tā  Raymond Kaiki, "He tīmatatanga tēnei, ahakoa te tokoiti o ngā kapa, ko ngā mana kua mau mai e rātau, he nui.”

E ai ki a Tai Huata,"Ko ngā whakaaro e pupū ake ana i te hirikapo, tuatahi, ko te hari me te koa, e tōpū mai te iwi ki tēnei o ngā kaupapa, kāre he kaupapa i tu atu"

Arā hoki ngā kanohi hōmiromiro i noho ki te pae whakawā, ā, ko te nuinga o rātau kua taunga haere kē ki ēnei mahi.

Hei tā Raymond, "Katoa o ngā kaiwhakawā nō Maniapoto. Kātahi rā ka kite i te ikeike o rātau kua roa nei rātau i roto i ngā āhuatanga o te kapa haka, rātau kua eke atu ki taumata o Te Matatini.”

He tāonga hōu i whakairohia mā ngā toa o te wāhanga karanga tamariki, karanga rangatahi, karanga pakeke hoki. Nā te ringatoi a Te Kuiti Stewart i mahi, ā, i tapaina ai rātau ki ngā ingoa Te Manutūke, Te Mahuru me Te Moroiti.

Ko tā Paparauwhare Campbell, "Tēnei te mihi ki ngā kaiako, ngā kaiwhakawā i whakarite i tēnei kaupapa mō te rā nei."  

Mai i ngā tamariki, tae noa ki a ngāi pēperekou mā, i pāorororo mai te wairua whakahīhī i te whare.

E whakaponotia ana mā tēnei kaupapa e whanake ai te reo, ngā tikanga, me te ahurea Māori ki roto tonu i te iwi, a, he wawata nui tō ngā uri mō tēnei tauwhāinga, a muri ake nei.

Hei tā Te Ingo Ngaia, "Koira taku tino tūmanako, kia kite i ngā whānau, huhua i konei me te takatū ake i ō rātau ake kapa ā whānau, ā hapū, ā marae, kia ora ai ngā waiata o ō rātau ake marae, ki tēnei o ngā huihuinga o Maniapoto"

Ko te whakaaro a Hinekahukura Aranui, "Ki a au nei, kua tū matāra a Maniapoto, kua tū mataara i roto i tōna mōhiotanga, te kapa haka, te Māoritanga."

A te māeatanga ake o kōanga a tērā tau, puāwai mai anō te taiopenga Te Nehenehenui.