E whakahētia ana e te hapori o Huapai te kaupapa whare hou

Heeni Brown
  • Tāmaki Makaurau

Ko te tuarua o ngā whakapuakanga kaupapa whare hou mō Tāmaki Makaurau i puta i te rangi nei i te Koromatua o te rohe, i a Len Brown, rāua ko te Minita Take Whare, ko Nick Smith.

I tae ake tā mātou karere a Heeni Brown ki te hui i Huapai, heoi, kīhai i hanga pai ngā hua, ki ētahi o te hau kainga.

Kei mua ko Len Brown raua ko Nick Smith, kei muri i a rāua ko te hapori o Huapai, engari kīhai a Huapai i te tautoko i ngā whakatau hou.

E rua mano ngā whare hou ka tuwherangia ki Huapai e taea ai te pani me te rawa kore te hoko whare, mo ētahi o taua hapori kīhai rawa i mohio.

I taua hui i puta te amu a ētahi o te hapori kihai i whakamohiotia e te Kaunihera ngā whakamārama ki a rātou.

Ko te whakahoki a te Koromatua a Len Brown ki a rātou kua hui tahi te Kaunihera me te poari me ētahi o ngā mema o te hapori, ehara ko te katoa.

Tekau katoa nga paraka whenua kei raro i tēnei kaupapa mai i Huapai tae noa ki Pukekohe.

Ono mano katoa ngā whare hou ka whakatūwherangia ki aua wāhi o Tāmaki Makaurau.

Ko te nuinga o ngā wāhi i whakatauhia, kei te takiwā o Tamaki ki te rawhiti me Tamaki ki Te Tonga.

Ko tā te Koromatua a Len Brown he kaupapa pai kia whakatau i taua kaupapa ki reira kia noho tonu te katoa o te hapori ki taua wāhi. Heoi mārakerake te kite ki taua hui i te kore whakaae o te hapori ki ngā kōrero o te Koromatua.

E ai ki a Len Brown he ono marama kei mua i i te aroaro, na ko tēnei te wā e taea ai ngā hapori maha te whakaae te whakahe rānei i ngā papakainga hou.