E whakahē ana ētahi kainoho o Kāwhia i ngā kōrero a ngā pirihimana

  • Waikato/Te Waiariki

I whakamātau a Kātipa Griffin ki te mauhere i a Maikuku i te Pōmere, ā ko tā Griffin whakapae, i haupatua a ia e tētahi tokorima. Nā ngā kōrero mō te haupatutanga, toko ake ai ētahi matapakitanga mō te whakamau pū ki ngā āpiha me te whakapiki i te tokomaha o ngā āpiha kei ngā taone itiiti.

I kōrero ngā mema o te hapori ki tā mātou kairīpoata, kia Harata Brown mo ngā āhuatanga me ngā kōrero kua pupū ake. Ko tāna i kōrero ia ki ētahi o ngā mema o te whānau o Maikuku, ko tā rātou kua kaha patua rātou e te whakamā nā tēnei āhuatanga. Heoi, i tāna kōrero tahi ki ētahi o ngā hoa o Maikuku he tino rerekē a rātou ake whakaaro ki ēra o ngā pirihimana. Hei tā ngā hoa, me ētahi atu i reira i te wā o te tukinga, mei kore ka tūtū mai te puehu inā ka noho ko ngā kōrero a te pirihimana hei tuāpapa mo ngā tūāhuatanga i puta i te Rāmere.

Tuia ki tērā e ai ki ētahi atu mema o te haukainga, i ohorere pai rātou ki ngā kōrero i puta mo te wharanga nei, he rerekē rawa atu ngā whakapae a te pirihimana ki ēra i kite a tinana nei, he aha pū te wairua me te āhua a te kātipa me Maikuku. Hei tā ētahi o te whānau he tangata hūmarie kē a Maikuku, engari nā tāna taitamariki, kāhore e kore ka hapa ia i ētahi wā.

Ko te whakapae a ētahi i te wāpu i te putanga mai o te riri, nā Katipa Griffin kē te hē, i te whakarewa hoki a Maikuku i ōna ringa horekau hoki a Maikuku i te whakaputa i te āhua riri. Heoi, i te wā i huri a Griffin ki te whakaputa i te hau pepa, i te rongo hoki a Maikuku i tōna whāea e karanga, e tangi ana i huri katoa tōna āhua ki te pukuriri, ā i rutua e ia te āpiha rā.

Nā te putanga o ēnei kōrero kua puku te rae ā ngā pirihimana me te kī mēna he kōrero he rīpene anō tā te hapori, ko te tikanga me heria aua kōrero kia rātou kia tāea hoki rātou te āta tiro atu ki ngā kōrero katoa mō tēnei kaupapa.

Kairīpoata: Harata Brown.