Kaupapa: Ngāpuhi

E whakaae ana te whare taonga hōu o Waitangi kia whakahokia ētahi taonga ki a Rankin

updated
  • Te Tai Tokerau

Kei te hiahia tētahi rangatira no tētahi hapū o Ngapuhi a David Rankin, kia whakahokia mai e tētahi whare pupuri taonga hou, ētahi taonga tapu ki tōna hapū a Te Matarahurahu.

E totohe ana a David Rankin, kia hoki mai te toki na te tupuna a Hone Heke no Ngapuhi a Teketanumia, me te rākau makutu hoki a te tohunga a Papahurihia, ko Rangiāwhiowhio ki a rātou. 

Hei tā Rankin, "Ka hoki mai nga taonga ki a matou o Te Matarahurahu."

Kei roto ngā tāonga nei i Te Kōngahu, he whare taonga hou i Waitangi, i tūwhera i te rā o Waitangi ki te iwi whānui.  Na, i whai wāhi te whare taonga nei ki ngā whanaketanga o ngā papa whenua o Te Tiriti, e tekau mā whā miriona taara te wāriu. 

E ai ki a Mori Rapana, tētahi māngai o Te Kōngahu i Waitangi, "Ahua pohauhau ana matou, i haere te koroke ra ki te hunga papaho i te tuatahi na te mea kua roa ke te hononga pai tatou ki a ia. Ko toku whakaaro, he raru ano tona, haere a kanohi mai hei noho, hei korero i te tuatahi."

Hei tāna anō, "Ka tuku matou he panui, he rahiri atu matou ki a ia, me nga iwi, hapu whanau katoa, me nga kaumatua kuia o Matarahurahu, o Heke ma."

Hei tā Rankin i whakaae hoki te hapū o Te Matarahurahu kia takoha atu ngā tāonga nei ki te Whare Taonga.  Nō muri kē mai, hei tāna, horekau ngā pepa whakaae tika i riro i a rātou.  "E kore ratou e korero mo te tikanga, mo te tino taonga a Rangiaowhiowhio te rakau makutu, e kore ratou e korero mo nga conditions me nga tini atu."

Engari ko tā Rapana whakautu, "Kao, kei a matou nga tuhingaroa tika mo nga taonga, nana i waitohu, kei a ia nga tuhinga mo nga taonga, a, kei a matou ano he kape."

Kua ripene tā atu Te Kōngahu ki a Rankin, nā runga i tana kore whiwhi tono ki te tūwheratanga.  Ka mutu, e tumanako ana te whare taonga ka tūtaki kanohi ki te kanohi atu rātou ki a ia, ka whakahoki ano ratou i ngā taonga ina koia te wawata whakamutunga.