Kaupapa: Tainui

E whai mana ana te Māori i roto i ngā whakataunga a te Kaunihera

Mānia Clarke
  • Waikato/Te Waiariki

Kei te whai mana te Māori i roto i ngā whakataunga a te Kaunihera, e ai ki te Kaunihera o te taone o Kirikiriroa. Mō te wā tuatahi, tokorima ngā Maangai Maaori kua tohua ki runga i ngā komiti e whā i roto i te kaunihera, ā hei tā Norman Hill, te mangai ā-iwi, ko ō rātou mana kei te mārama te rangona.

Ahatia koinei te nohonga tuatahi mā tauhou mā Norman Hill e whai hua ana tōna reo.

“I roto i ngā rīpoata rā korekore haere e au i te tirotiro ngā whakaaro Māori, ngā āhuatanga Māori ki ngā risk management, ā, kia whakaaro ake e au kia mau ki ngā tikanga me ngā kawa kia ū ki te whakaaro o Waikato-Tainui i roto i tērā atu ngā rīpoata,” i mea atu a Hill mema o te komiti Whakawhanake Hangatanga.

“Nō reira, kia hari rātou ki te whakarongo ki tērā whakaaro, kia mōhio rātou ngā general managers, kāore anō rātou kia ū  ki tērā atu kaupapa nō reira, kia mau ki tērā te kaupapa anga whakamua ināia tonu nei,” te kī atu a Hill.

E ngana hoki ana ngā Maangai ā-Iwi a Te Pora Thompson (Komiti Hapori Ratonga Taiao) rāua ko Bella Takiari-Brame (Komiti Putea) ki te kōkiri i ngā take hei pāinga mō ngā iwi Māori.

“Me mau tātou ki ngā whakakitenga a ngā mātua tīpuna, a ngā Iwi Māori. Ko te wero tuarua ki ngā Iwi Māori me whakapōti.

“I korero mātou mō ngā rēti me ngā pānga ki ngā whānau e noho ki ngā kāinga mana. I whai wāhi au ki te whakamārama i te kaupapa o ngā papakāinga me ngā pānga ki a ngāi Māori,” i mea atu a Takiari-Brame.

Kua tekau mā waru marama ngā hapū o Waikato-Tainui me te kaunihera o Kirikiriroa e kōkiri ana kia whakatūngia ngā nohonga rā, kia ōrite hoki te mana ki ngā kaikaunihera.

“Mēnā he hua mō ngāi Māori, mō ngā maataa waka hoki i Kirikiriroa, he pāinga hoki tērā me te tāonenui, kia whai mana hoki tō rātou reo,” said Hamilton City Council CEO Richard Briggs.

“He pāinga hoki tērā mō te kaunihera me ngā kaimahi. Me whakatutuki mātou i ngā hiahia o ngā Maangai Māori ka tika,” te kī atu a Briggs

Ka tū ngā kōwhiringa pōti ā-kaunihera ā tērā tau, ā, ka whai a Takiari-Brame kia whakatūturuhia ngā nohonga Maangai Maaori.