E wawata ana ngā iwi o Whangarei kia whakatūria tētahi whare whakaruruhau i ngā tikanga Māori

  • Te Tai Tokerau

E hia nei te roa ngā iwi o Whangarei e wawata ana ki tētahi whare whakaruruhau i ngā tikanga Māori.  Ko tētahi tauira mō taua whare kua oti te hanga, ka mutu, ko te aronui o ngā kai-ārahi i te kaupapa, ko te kohikohi i ngā pūtea hei kōkiri i ngā mahi whakatū i a ia.

Koinei te tauira hōu o te whare Māori motuhake i wawatatia ai e ngā mātua o Whangarei mō neke atu i te toru tekau tau.

Hei tā te tohunga whakairo, a Te Warahi Hetaraka, “To rātou nei hiahia kia tū he whare pēnei nā hoki hei whakaruruhau i o tātou nei tikanga Māori ne toi Māori ērā mea katoa.”

He whare mātauranga tēnei mō ngā iwi o Whangarei, he whare toi, he whare pupuri taonga anō hoki.

E ai ki a Te Warahi Hetaraka, “Wā tātou nei taitamariki, taitamatāne, taitamawāhine haere mai hei ako hoki rātou a tātou nei kaupapa Māori kei konei, ā, koira hoki te hiahia tuatahi.

Kua whai whakaaetanga tēnei kaupapa i ngā kaunihera e rua me te rīhi o te whenua.  Ka mutu, kua tata oti ngā mahere mō te wāhanga tuatahi o te whare Māori, arā ki te whakahou i tēnei whare me te hanga he whakaruruhau mō ngā waka.  Inaianei ko te pūtea tautoko te whāinga matua.

Ko Te Warahi Hetaraka tērā e mea ana, “To tātou nei hiahia ki te kōrero hoki ki ētahi o ngā rūnanga ētahi o ngā tarahiti Māori ka haere mai ki te tautoko i tēnei kaupapa.  Koinā hoki te mea nui te mahi nui kei mua i a tātou i tēnei wā.”

Iaianei kua parea ētahi tino kaupapa o Whangarei ki te taha, tēnā pea kua eke te wā mō tēnei whare Māori.

Tuaritia: