Kaupapa: Kapa Haka

E ū tonu ana te whai a ngā kōtiro o Turakina kia tū rangatira rātou ki te papa-tūwaewae.

Heeni Brown
  • Te Tai Rāwhiti

He tangata kei rō hōhipera tonu whai muri i te tukinga o tētahi pahi kura i Te Tairāwhiti inanahi. E whā tekau ngā tāngata i runga i te pahi i te haria ki tētahi whakataetae kapahaka, i te wā i tuki atu ki tētahi awarua, whakatētonga i Tūranga.

I wehe te pahi o te Kura Kōtiro Māori o Turakina i te rori ki Tūranga, i te takiwā ki Wharerata, i te ahiahi inanahi. Tekau mā rua ngā tāngata i kawea ki te Hōhipera o Tūranga, heoi ahakoa te hauata kua pā, kua aro ngā whakaaro o ngā kōtiro ki te mahi i tae mai ai rātou, ara ngā Whakataetae Kapahaka ā-Motu o ngā Kura Tuarua.

Kua tere whakakotahi atu ngā kaiako, ō ratou kaitiaki, ngā kaiwhakahaere o te whakataetae me ētahi atu kura ki te tauawhi me te hāpai i a rātou.

Hei tā te tumuaki o te kura, a Terehia Channing, “Kei te pai ta mātou noho kei te ora ngā wairua a ngā kotiro, kei te ora tonu mātou katoa. Ko taku kōrero ki ngā whanau, ki ngā mea kei te āhua wari, kei te rawe te noho a ngā kōtiro. Kei te pai o rātou wairua.”

Whai muri i te haringa o ēra i whara ki te hōhipere inapō, kotahi te kotiro i whakahokia ki te hōhipera i te ata nei, kia āta tirohia e ngā tākuta. Ahakoa rā tēnei takarepatanga e ū tonu ana te whai kia tū rangatira rātou ki te papa-tūwaewae.

Ki te papa rēhia o Tūranga i te rangi nei, tērā ngā mahi whakatikatika whakamutunga nei i te kawea ake kia rite ai te papa hei ekenga mā ngā kura hei te tīmatanga o te whakataetae āpōpō.

Heoi mō ngā kōhine māia nei o Turakina, kāore he wā e huritao ngā mahara, engari he kotahi atu anō ki te kaupapa

Ka tū a Turakina hei te toru karaka i te ahiahi āpōpō, te tuaiwa o ngā kapa tekau mā whā o Puna A.

Ā wetiweti ana te rāhiri a ngā kapa iwi kāinga o Te Tairāwhiti ki ngā tini. Nā, i tae tahi atu ngā kōtiro me ngā kapa whā tekau o te motu ki te pōhiri i Te Poho o Rawiri Marae i te Rangi nei

Ko te rikarika me te ihiihi o ngā kura i taea te kapo, inā hoki ko te whakatīnanatanga tēnei o ngā wiki tekau neke atu, rātou e āta whakatikatika ana mō ngā whakataetae nei.