E tono ana tētahi ope porotēhi kia puta tūmatanui te katoa o ngā kōrero mō te kawenata TPPA

Taroi Black
  • Tāmaki Makaurau

Ko ngā tari matua o Te Manatū Aorere i Tāmaki Makaurau i tomokia e tētahi ope porotēhi i te rā nei i runga i te whai, kia puta katoa ki a tūmatanui te katoa o ngā whakamārama mō te kawenata TPPA.

E whakahaere ana te rōpū e kiia ana ko 'Show Us Ya Text' i tētahi rapunga nui puta noa i te motu, e hanga hianga ana te aro. 

I tūmeke katoa te Manatū Aorere i te hunga porotēhi me ō rātou mōhiti whārahi. 

E waru rau ngā kaitautoko a tēnei rōpū 'Show Us Ya Text' i runga o Pukamata.  E whakahāere ana rātou i tētahi rapunga nui mō ngā tuhinga kōrero i te kawenata TPPA.   

Ko te whakakore i ngā here tauhokohoko te whai a te TPPA i waenga i ngā whenua tekau mā rua o Ahia me Te Moana-nui-a-Kiwa. I tīmata ngā whakawhitinga kōrero i te tau rua mano mā rima, ko tōna tikanga ka tau i te tau rua mano tekau mā rua. Engari e tōtara wāhi rua tonu ana te noho a ētahi.

I tērā tau, i tū tētahi hui muna ki Kānata.   

Hei tā te Manatū Aorere, he tika ngā mahi a te TPPA. Mā tēnei whakaaetanga, ka pakari ake te ohanga o Aotearoa, me te whakatairanga hoki i ā tātou rawa.  Engari hei tā etahi, kei raru pea te mana motuhake o Ngāi Aotearoa. 

Ka haere tonu te porotēhi ki roto i Te Ūpoko o te Ika, i raro i te kaupapa Show Us Ya Text, ki te kore ngā tuhinga kōrero a te TPPA e whakaaturia ki te katoa hei te paunga o tēnei marama.