E tautoko tonu ana ngā tauira o mua i Te Ahurea

  • Tāmaki Makaurau

Ka pupuri tonu Te Kura Māori o Ngā Tapuwae i te taitara toa i te tau rua tekau o Te Ahurea Tino Rangatiratanga mō ngā Kura Tuarua o Tāmaki Makaurau. E ai ki a Renee Savage, tētahi o ngā kaihaka tuatahi, e tautoko tonu ana te kaupapa nei i te hunga i tū e rua tekau tau ki muri.  

Ahatia te māku me te makariri, e wera ana te mura o te ahi i te papatūwaewae.

E ai ki a Renee Savage, tētehi o ngā kaihaka tuatahi, tumuaki tuarua hoki i Te Kura Māori o Ngā Tapuwae, he maha ngā hua kua puta i te whakataetae nei.

“Ko ētahi ko te whakawhanake i ngā tauira o mua, ngā kaihaka o mua, kua puta hei kaiako mō ngā rōpū e tū ana i ēnei rā, nā wai rā, kua tū hei kaiwhiriwhiri mō te kaupapa, nō reira kua hoki mai rātou ki te hiki i te mana o te kaupapa.” 

Hei tā te Tumuaki o Te Kura Māori o Ngā Tapuwae a Arahia Stirling, “Ka piki ake ngā pukenga o ngā tamariki, mārama pai ki ō rātou waiata, ngā kupu a ngā waiata, tino hohonu ā rātou kōrero i roto i ō rātou mahi.”

Nō te tau waru tekau mā ono i tū ai te taiopenga Ahurea Tino Rangatiratanga tuatahi, nā ngā kaiako reo Māori i Tāmaki i whakatū, kia pupuru tonu ai rātou ngā kura me ō rātou whānau ki ō rātou mana motuhake whakahaere.

Hei tā tētahi Mātua oTKM o Ngā Tapuwae a Piripi Taylor, “He hua Māori te tuatahi, Ko te whakakotahi mai i ngā whānau Māori te nuinga o te wā e noho marara ana ngā uri Māori o roto o Tāmaki nei.  Ko te painga o tēnei kura, ka kume mai, ka tatō ngā whānau o te kura ki te kura mō ngā tamariki, mō te mātauranga Māori hei painga mō tātou.” 

A tērā tau ka hoki ngā kapahaka ki te papatūwaewae.  Ko te kapa ka toa, me te rōpū ka eke ki te tūranga tuarua ka haere ki te whakataetae ā motu ka tū ki Manawatū, ā te tau rua mano tekau mā waru.  

Tuaritia: