E rere ana ngā wero ki te kāwanatanga mō te wehenga o ō tātau hōia ki Iraq

  • Te Whanganui-ā-Tara

E rere ana ngā wero i ngā rōpū āpitihana ki te āhua noho ngū o te kāwanatanga ki ngā whakamarama mō te wehenga o ō tātou hōia ki te whenua o Iraq mō te pakanga ki a ISIL.

Nō te rā nei wehe ai te tira tuatahi o ngā hōia o Ahitereiria, ā, i runga i te mōhio kei Te Pāpakanui-a-Maui ō tātou hōia e whakaharatau ana, ko te pātai pēn kua wehe hoki ko ratou? 

E whakarite ana a Ron Mark mō tana haerenga, ā, hei tāna me whakapuakitia e John Key āhea haere ai ō tātou hōia.

Kei Ahitereiria ngā hōia o Aotearoa e whakangungu ana. Inanahi i whakapuakitia e Pirimia Tony Abbott hei te rā nei wehe ai te tira tuatahi ki Iraq. Heoi, karekau a John Key mō te whakamana mēnā ko ō tātou hōia ētahi o taua tira.

Kāti e whakaae ana te kaiārahi o te Rōpū Reipa arā ngā mōrearea te whakamōhio whanui i ngā rā pū e haere ai ngā hōia, heoi, hei tāna me kaua te iwi e rongo kōrero i Ahitereiria noa. 

Ko tētahi atu māharahara nui ko te haumarutanga-a-ture nei o ō tātou hōia inā tūpono raru rātou ki te whenua o Iraq. E ngutu ana te kāwanatanga mō tēnā. 

Hei tēnei Rātapu tau mai ai a Pirīmia Tony Abbott ki Pōneke nei mō ngā mahi whakamaumahara o Anzac.

Kāore e kore ko ngā whakamārama mō ngā hōia tuatahi kua tau atu ki te pakanga ki a ISIL ka patapataitia.