Kaupapa: Elections

E rata ana te rōpu Reipa kia tū a Julian Wilcox hei kaitono mā rātou

  • Tāmaki Makaurau

Ao ake i te hui ā-tau a te roopu reipa i nga rangi whakataa nei, e rere ana ngā whakapae mō te hunga kai-tono ka tū pea mā Reipa ki ngā tūru Māori.

Ko Julian Wilcox, pou whakahaere kawe pūrongo ki Whakāta Māori tētahi ingoa kua horapa whānuitia.

Ao ake i te hui a tau a Reipa, koia te roopu kei te putake o ngā korero o te wā, me te whakapae ka tū pea a Julian Wilcox ma rātou, hei kaitono ki Tāmaki Makaurau. E ai ki tē matanga torangapu, ki a Willie Jackson, he kiko to te korero.

Ko tāna - “tino tika, tino tuturu tēnei kōrero kua rongo tana ingoa i tērā tau, inaianei, he kaupapa tuturu i tēnei wā". 

Tuturu ahakoa te korero a Julian Wilcox ko Whakāata Māori tona aronga i tēnei wa, ehara i te mea kua katia te tatau ki te whare paremata.

Ko tā Wilcox."kei tua o te awe māpara he ao kē he ahuaranga kē no reira waiho pea aua ahuatanga mo apopo, mo apopo ano kōrero ai".  

Ko tētahi atu ingoa kua puea ake mo te tūru o Tamaki makaurau ko tera o Shane Taurima, heoi, hei tāna ki a au i te rangi nei kaore ia mo te tū ki Tamaki nei, kaore hoki i te rapu waahi ki te rarangi o te roopu. Māna, ki te tukuna tetahi ki a ia, ka aata whakaarotia.  

Hei ta Willie Jackson, me ngoki pea te haere a enei pou paapaaho ki te ao torangapu.

Ko tāna, "koina te raruraru mo Shane rāua ko Julian ne mena ka whiriwhiri rāua i tēnei kaupapa ka ngaro pea mo ake tonu atu".

Kāti ko taua korero ano rā, ma te wā e kite ake ka taka pehea te take nei.