Kaupapa: Te Reo Māori

E rata ana ngā whānau Māori ki te kaupapa 'Māori 4 Grown Ups'

  • Tāmaki Makaurau

Ehara i te mahi ngāwari te ako i te reo Māori.

Heoi anō, ko tā tētahi rōpu-ā-whānau, mā te korero i te reo Māori ki te kainga, e ora ai te tāonga nei.

I karapine atu ngā whanau kōrerō Māori ki Tāmaki Makarau i te Rāhoroi ki te āta wānanga i ētahi huarahi hou e ngakautiti kaha ai ngā whānau ki te kōrerō Māori.  

Ae marika, ko te reo Māori e pāoro ana i te akomanga, ki te papa takaro hoki

Hei tā Lily Fraser o Ngai Tahu, i te whānautanga mai o te tamaiti arā ngā āhuatanga hou o te reo e hiahiatia ana.  

“I etahi wā i te wā e ako ana i te reo, kei te ruku hohonu ki ngā kupu tawhito, me ērā kupu. Ēngari ā te wā ka whānau mai te tamaiti, kātahi ka kite koe arā noa atu ngā kupu kāhore i a koe”.  

Ko tēnei te tau tuarua kua whakahaerehia te wānanga noho marae e kīa nei ko 'Māori 4 Grown Ups'.

A, he mea whakahaere te kaupapa nei e Māori 4 Kids Inc, ko tā rātou aronga matua he whakaora i te reo o te whānau,

Hei tā tētahi o ngā kaiako o te wānanga, ko Hohepa Ramanui te ingoa o Ngāpuhi, ko te whainga matua, “Ko te whakakainga ano i te reo Māori ki te arero, kātahi ki te kainga, kia kōrero ai ngā mātua ki ā rātou tamariki mokopuna i te reo Māori.”

Inā pakari ake ai te reo kōrero Māori o te whanau, hei tā Wiremu Mato o Ngāti Porou, “Ka huri ki te whakaaro Māori hoki, ā, ko te reo Māori tētahi huarahi kia whai i tērā hiahia.”

Nā wai, nā wai, ka tae tawhiti mai te whānau Ratima-Edwards mai i ngā rekereke o Taranaki Maunga ki Tāmaki nei ki te whakapakari i tō rātou reo ā whānau me ngā whānau e ngākau nui ana ki te kōrero Māori. 

Ko tā Mihi Ratima o Te Whakatōhea o Ngāti Awa hoki, he kaupapa rangatira tēnei ki tōnā ake whānau.

“Kia tupu ake ēnei tamariki i te reo, ēngari ki te taha o ngā whānau kōrero Māori” te kī a Ratima.  

E tūmanako ana a Māori 4 Kids Inc. ki te whakarahi ake i ngā kaupapa ako e aro atu ana ki ngā whānau, ahakoa pēhea nei te kounga o te reo.