E rapu pononga Māori ngā Pirihimana

Wepiha Te Kanawa
  • Tāmaki Makaurau

I tū ngā hui whai mōhioranga mō ngā Pirihimana huri noa i te motu, ā, ki Tāmaki Makaurau neke atu i toru rau ngā tāngata i tae atu ki te papa rēhi hoiho o Ellerslie ki te whātaretare i ngā mahi.

He mahi mā te katoa, ā, ki te kore anō koe e mohio he aha te mahi a te pirihimana, ka mohio a muri ake nei. E ai ki a Nga-Wati Chaplow nō Ngāi Te Rangi, “He whakaatu i tō mātou mahi, ko wai mātou, he aha tō mātou mahi, wai hoki hei whakahonohono, hei whakawhanaunga ki te ki hapori.”

Ko te whainga matua o te rā Pirihimana ko te rapu pononga, ā, ko te Māori tērā e whāia ana, “I te wā nei tokoiti te nama, engari ko te hiahia a te rōpū pirihimana kia piki haere te tangata Māori ki roto i tēnei rōpū.”

E ai ki a Ngā-Wati kei te whakaaro kinohia o ngā Pirihimana i waenga i te Māori, engari e manako ana ia mā te āta whakaatu i a rātou mahi tērā manawakawa e whakareka, “Koinei te take kei konei tātou i tēnei rā, penei i tōku korero he whakaatu ki a rātou he aha tō mātou mahi.”

Nō reira kotahi noa te pānui a Nga-Wati ki te marea, “Mēnā kei te hiahia koe ki te tūhonohono ki te Pirihimana, ka haere mai, ka titiro, ka whakarongo, ka mārama.”