Kaupapa: Elections

E rangirua ana ngā whakaaro o ngā rangatira ā-Iwi ki ngā kaiārahi hōu o te Rōpū Reipa

updated
  • Te Tai Tokerau
  • Tāmaki Makaurau
  • Waikato/Te Waiariki
  • Te Tai Hauāuru
  • Te Tai Rāwhiti
  • Te Whanganui-ā-Tara
  • Te Waipounamu

E pātai ana ngā kaiārahi ā iwi, he aha te take kāre i tohua e Reipa he māori ki ngā tūranga kaiārahi i mua noa atu. Ko te angitū kore nei o te tono a te mema o Hauraki-Waikato, a Nanaia Mahuta mō te tūranga kaiārahi tuarua i te tau rua mano tekau mā whā e kōrerotia ake nei.

E rangirua ana ngā whakaaro o ngētehi rangatira ā-Iwi ki te ekenga o Kelvin Davis hei rangatira tuarua mō te Rōpū Reipa.

Hei tā Toby Curtis, "Ahakoa wāku mihi ki a Kelvin. Kei te pai tērā, engari ka titiro ki wāna hoa Pākeha katoa, nā reira ko tāku titiro, he aha ai rātou i kore whakatūngia hoki a Nanaia, i tōna wā. I te mea kāore i whakatūngia anā, kua huri te Kiingi ki a rātou."

Ko tā Ngahiwi Tomoana, "Pai mōna, pai mō Te Pāti, engari me mahi ēnei momo mahi mai rā anō, mai i rānō nā te mea, ko te tokomaha o Māori e tautoko ana ki a Reipa, me te matapiko o Reipa kia whakatū tētahi Māori hei māngai tuatahi, tuarua anō hoki. Ka noho whakamā mātou ki tērā."

Nō te tau rua mano tekau mā whā a Mahuta i kōkiri ai tana tono hei pouārahi tuarua mō tana rōpū tōrangapū me te tautoko a te kaunihera Māori o te Rōpū Reipa, engari auare ake.

Hei tā Nanaia Mahuta, "Kua hipa te wā māku, i tarai, kāore i toa, e pai ana kua puta mai a Kelvin hei tuarua, ko taku tino kite, ka tae ki te wā ka whakapakari ake tā mātou Rōpū Reipa, ā tēnei kōwhiringa pōti, ana, kua kite mai pana anō te kuaha kia eke tētehi Māori ki te hautū i te Pāti Reipa."

Nō te wiki nei i kōwhiria a Kelvin Davis hei tuarua mā te kaiārahi hōu a Jacinda Adern, he mea tautoko te tokorua nei e te katoa o te kāhui o ngā mema o Reipa.

Hei tā Margaret Mutu o Te Rūnanga ā Iwi o Ngāti Kahu, "Ata hakarongo ki tō iwi. Mōhio ana rātou pēhea te huarahi tika, pēhea te whai atu i ngā mea tika. Nā, ka whai atu i tāua huarahi. Kaua e waiho mā te Pākeha e kī, me pēnei me pērā. Ahakoa te kaiārahi tuarua, ko koe te kaiārahi mō tātou te Iwi Māori."

Hei tā Mahuta, ko te aronga matua o ngā rangatira hōu, hei kapo i te pōti o te hunga rangatahi. Wheoi tāria te wā ka kite tātou mēnā āe rānei ka whai hua te rautaki hōu a te Rōpū Reipa hei te kōwhiringa pōti ā tērā marama.