E pupū ana tētahi tautohe nui I waenga i Te Poari Matua o Te Kōhanga Reo me tētahi o āna mema

  • Te Whanganui-ā-Tara

He tautohe nui e pupū ake ana i waenga i Te Poari Matua o Te Kōhanga Reo me tētahi o āna mema poari, me Toni Waho.

I te rangi nei i whakatakoto kēhi a Toni Waho ki te Kōti Teitei o Te Whanganui a Tara, he kōrero i whakamanangia e tana roia e Felix Geiringer. Hei tana e tono ana rātou kia wawe tā te kōti rangona i te kēhi, heoi, i mutu ana kōrero i reira. 

E ai ki ngā whakamahuki kua tae mai ki au, i te Wenerei o tēnei wiki tonu i hui Te Poari Matua o Te Kohanga Reo, i reira tautokotia tētahi motini e karanga ana i tētahi hui anō ki reira kōrerohia ai te whakawāteatanga o Toni Waho mai i tana tūranga mema poari. Na, marakerake te kitea na tana rapanga kēhi ki rō kōti, kei te kaha whakahē a Toni Waho i tēna mahi.   

Na, i tēnei wā ka noho ngā mema o te poari ki o rātou tūranga, ā, mate noa. Engari, ara tētahi huarahi e taea ai, hei pana i tētahi mema, pena i takahia e te mema rā te mana o te poari. Na, e mōhiotia ana hoki ko Toni Waho tēra i tuku i te reta maharahara ki te Minita Matauranga, ki a Hekia Parata, mo ngā whakapaunga pūtea o roto o Te Pataka Ohanga, na wai ra ka karangatia te Tari Hara Taware e te Minita.

Kāti, i tono uiui ahau ki a Toni Waho, ki te Poari Matua o Te Kohanga Reo ano hoki, engari raua tahi kaore mo te whakaputa kōrero.