Kaupapa: Australia

E pakanga ana te Iwi Moemoea o Boulder mo tā rātou mana

  • Ahitereiria

Ki Ahitereiria, he wāhi whai rawa a Kalgoorlie, he taone e ono rau kiromita atu i Te Urupū, he moka e kapia ana e te rua kohuke.

He nui ngā hua e puta ana i te mahi nei, engari he hua kāre e taka ana ki te tangata whenua, arā, te hunga nō rātou ngā whenua kua riro mō te keri koura.

Ko Kalgoorlie kei roto i te rohe Goldfields, he wāhi keri koura engari kei raro iho i tēnei rua e mōhio whānuitia ana ko te Super Pit, ko te hapori iwi moemoeā o Boulder, he putunga para kē tōna rite.

Kua puku te rae o Geoffrey i te whakatau a te Kāwantanga ki te aukati i ngā hapori taratahi, ā, e whakaaro ana ia ko te aronga kē, ko te whakawātea i ngā whenua mō ngā rawa kohuke.

E toru ngā hapori iwi moemoeā kei ngā taupa o Kalgoorlie, ko Boulder, ko Kurrawang me Ninga Mia. Ko Ninga Mia nei kei waenganui i ngā maina e rua.

Ia Rātapu ka whakahaere karakia a Geoffrey ki konei, ā, e noho ana tōna tuahine me ētahi atu o tōna whānau ki konei.  Nā whai anō te nui o te āwangawanga mō te orangatonutanga o tēnei wāhi.

E tū rangatira hoki ana tēnei kaumātua o te hāhi mō tōna whenua, ka haere ia ki te kooti hei tērā wiki mō te pupuhi pū ki te rangi i te maina pātata atu ki te hapori moemoeā ki Mt Margaret.

Hei tāna, ko te hiahia kia mutu ai te mahi keri whenua ki taua takiwā.

I te Kāwanatanga e titiro ana ki tēnei takiwā hei rua koura, ko te hiahia noa a te hapū o Wangakatja, kia kitea hoki rātou.