E ora marika ana te reo Tuvalu me ōna tikanga i Aotearoa nei

Wepiha Te Kanawa
  • Tāmaki Makaurau

Neke atu i te toru mano rima rau ngā uri nō te moutere o Tuvalu e noho ana ki Aotearoa, e rua hau toru o tērā hunga ka noho ki Tāmaki nei e ai ki te tatauranga nui o te motu, ā, ko te wiki o te reo Tuvalu tērā kua whanake ake i tēnei wiki e ai ki tētahi mema o te hapori Tuvalu o Tāmaki e ora mārikana an tā rātou ahurea. 

Hei tā Solia Kefa, e whakahīhī ana a ia, i tana Tuvalu-tanga i te mea he whenua iti tō rātou.

He reo e kore e tino rāngona ki Aotearoa, heoi ka kōrerohia te reo Tuvalu huri noa i te ao e tōna tekau mā toru mano tāngata.

Hei tā Sagaa Malua, me pupuri te iwi Tuvalu i tō rātou reo, mō te reanga tamariki i te mea he rerekē, he motuhake tō rātou reo.

Ko te kaupapa matua o te wiki o te reo Tuvalu ko te reo tō tūākiri.

E raru ana te motu o Tuvalu i te kino o te moana, nā reira, e ai ki a Sagaa Malua ko te orangatonutanga o te reo me ōna tikanga te whāinga matua.

Hei whakamana i tēnei wiki o te reo Tuvalu kei te tū ētahi wānanga reo, rā whakangahau hoki ki Tāmaki, Ōtaki, Te Whanganui-a-Tara me Waitaha.