E ohorere ana a Te Ururoa ki tā Reipa kaupapa-here Whānau Ora

Heeni Brown
  • Tāmaki Makaurau

E whakahau ana te kaiārahi o Reipa, a Kelvin Davis, ka hoatu te rua miriona tāra anō ki te kaupapa o Whānau Ora me tētahi kaiarotake i te kaupapa. Ēngari e mea ana a Te Ururoa Flavell me nui ake te tohatoha pūtea a Reipa ki tēnei kaupapa.

E mea ana ngā mema Māori o Reipa ka hapai ake tēnei rua tekau miriona tāra hou i a Whānau Ora.

Tā Kelvin Davis, kaiārahi tuarua o Reipa "Nā mātou i whakapūteangia rima piriona tāra ki ngā take mō ngā whānau e hiahia ana, vulnerable families, nā reira ka haere mai wēnei pūtea mō te whānau ora mai i taua pūtea rahi."

He kaiarotake hou mō te rima rau mano tāra, tana mahi, he kōrero tika atu ki a Paremata mō ngā wāhanga me whakatikatika.

Ko ngā pūtea ka tohatoha ki te kaiarotake nei nō ngā moni whakahaere, ēngari e ai tā Te Ururoa Flavell kei reira kē tētahi kaiarotake i raro i te ture.

"Te tikanga ia kia mutu rā anō te rima tau ka riro mā tētahi anō rā te kaupapa e whakamatautau, e arotake. Kei reira tonu tērā, kāre he paku aha nei o tērā momo whakatau o Te Reipa."

I te tau rua mano tekau mā rima, e rima tekau miriona tāra i tohaina mō ngā kaiarataki rua mano toru tekau mō te whā tau. I te tau rua mano tekau mā ono, e whā tekau miriona tāra anō i tohaina mō te whā tau. I te tau rua mano tekau mā whitu, he tekau miriona tāra anō mō te whā tau.

"E āhua ohorere ana ahau ki tērā momo whakatau, tuatahi nā runga i te mea mō ngā iwa tau kua hipa ake ko Reipa tērā i kaha nei ki te turaki i te kaupapa o Whānau Ora."

Ko te tūmanako ka aro mai te Pāti Māori ki tō rātou kaupapa-here, ēngari ko tā Flavell ki ngā kaipōti me tūpato ki te aronga o ngā pāti-matua ki ngā kaupapa-here Māori, pēnei i a Whānau Ora.