Kaupapa: Waka Ama

E ngana ana ngā kaihoe kia eke ki ngā tūranga toa o te whakataetae Waka Ama Kura Tuarua

Rahia Timutimu
  • Waikato/Te Waiariki

Koinei te rā e kitea ai e ngā kapa mēnā rānei ka whai urunga rātou ki ngā whiringa toa o Ngā Whakataetae Waka Ama ā-Motu mō ngā Kura Tuarua, inā ko ngā whiringa whāiti te kaupapa i te rā nei.

Ko te rēhi tuatahi o te rā ko te rima rau mita mā ngā kōtiro o raro i te tekau mā ono tau. Ko Tuakau i mua i te huringa, engari auare ake.

Kua rua tau te kura tuarua o James Cook e rēhi ana i tēnei whakataetae, ā, ngāwari noa tā rātou whai i tētahi tūranga ki ngā whiringa toa.

Ki te reanga mā ngaa taitama, e whitu ngā whakangungu a Te Rangi Aniwaniwa i mua i te whakataetae nei, ā, i whakaatuhia te hua o aua whakangungu i te whai tūnga atu ki ngā whiringa toa.

He whakanui tā te Kura Takiwā o Manganuiowae i tae ki ngā whiringa whāiti, hēoi, i tā rātou ekenga ki ngā whiringa toa, kātahi ngā whakanui ka eke ki tua o tāwauwau.

Ki te reanga kōtiro o raro i te tekau mā iwa tau, i whakaatuhia e te Kura Tuarua o Whanganui te kaha māmā o te rēhi nei.

Hēoi ko tētahi o ngā rēhi pai rawa o te rā ko tērā o te Kura Tuarua o Te Kuiti. He kāinga tuawhenua kē tō rātou, nā reira ko te whakangungu pēnei i runga whenua tā rātou mahi.

Mai i te rārangi tuatahi, i tātāwhaihia e rātou a Kirikiriroa me Hoani Waititi, ā, i te otinga ake i kitea ehara mā te wai, engari mā te ūpoko pakarū e whai urunga ki ngā whiringa toa.

Hei āpōpō tū ai ngā whiringa toa i te rā whakamutunga o te whakataetae.