E mahi tahi ana ngā Pirihimana me te whānau o te tama hourangi i ripenehia

  • Waikato/Te Waiariki

Kua hui tahi ngā Pirihimana me te māmā o te tama hourangi i ripenehia ki tētahi pāka i Kirikiriroa.

I roto i tētahi pānui whakapāoho e ai ki te Āpiha Matua o Kirikiriroa ko Greg Nicholls, i tae atu ngā Pirihimana ki te Pāka o Fairfield i te huarahi o Clarkin whai muri i ētahi karanga ki te nama ohorere o 111.

Ko tāna, " I hui tahi au me te māmā o te tama, ko tā te māmā ki te āpiha Pirihimana i tae atu ki te wāhi i taua wā i pohēhē ia i te takaro kē tana tama me ōna hoa, kihai ia i te mohio i te tuku waipiro ētahi atu tāngata ki a ia." 

I roto i taua uiui ko te whakapae a te tama i inuhia e ia e waru ngā kēne cody's he whitu paehēneti te nui o te waipiro kei ia kēne, a tuia ki tēra i inuhia e ia e rua ngā karaihe iti o te liqeur. 

Kua tuku tūpato te Āpiha Matua a Nicholls ki te hunga i tuku atu i te waipiro ki te tama ra, ko tāna, " he mahi hara tā rātou mahi a kua whati ture hoki, tāpiri atu he waimarie katoa kihai te tama i hinga nā tā rātou mahi heahea, na ngā ture hou e hāngai ana ki te waipiro ka tāea e matou te hāmene i aua tāngata te whaina i ā rātou te heria hoki ki te kōti mo aua mahi." 

Ko tā ngā Pirihimana kua kaha pouri rawa atu te māmā o te tama nei, a kei te mahi tahi rātou me te Uehā Mātātahi o Aotearoa me te whānau o te tama ki te āta tiaki i a ia. 

Ko tāna ano ko te whai a ngā Pirihimana ko te tango i ngā whakaahua o taua tama i te ipurangi.

Ko tā ngā Pirihimana ano, ahakoa te pouri rawa o tēnei ahuatanga ko tētahi o ngā hua pai kua kitea e rātou ko te kaha o te hapori o Kirikiriroa ki te whakapā atu ki a rātou ki te whakatika i tēnei ahuatanga. 

Kei Kirikiriroa tā mātou karere a Amomai Pihama, mo ētahi atu whakamarama tahuri mai ki a Te Kāea hei te 5:30 hei te 7:00 ka tōaitia.