E mahi ngātahi ana a Ngāti Porou me Contact kia utu i ngā nama hiko a ngā Marae

Aroha Treacher
  • Te Tai Rāwhiti

Kāhore he nama hiko mā tō marae, koia pū te tumanako o ngā marae o Ngāti Porou, he tata ki te rima tekau te rahi. Nā tētahi kaupapa motuhake ki waenganui i te iwi me te uepu hiko o Contact, e kīa ana ko Nāti Power, he tuatahitanga tēnei.

Muia ana ngā marae e ngā tāngata, he whare pukumahi, he wāhi e hautū ana i ngā manuhiri maha ia marama, ia tau. Engari, i ētahi wā kātahi te mahi taumaha rawa.

Ia tau, he rua mano tāra noa nei te nui o te nama hiko o ngā marae o Ngāti Porou, nā reira, ki te hono atu tētahi ki a Nāti Power, ka tākoha he rima tekau tāra mai i tō rātou ake nama hiko hei utu i ngā nama hiko o te marae.

E ai ki a Herewini Parata, “Me kī, ka taea te whā tekau mai ia, ia marae, ia marae, ka hua mai ko te kotahi mano rau tāra, ka taparangia tēnā, ki te waru tekau , ka hua mai ko te rua rau mano tāra.hei āwhina i ngā marae o te rohe.”

Ko te whai a te kamupene hiko kia whakapiki ake ai te nui o te iwi māori e hono atu ana ki a rātou. E whakapono ana a Contact ka piripono ngā uri ki a rātou mā te hua ka tau atu ki o rātou marae. Otira, ka kotahi atu ngā moni tūmā ki ngā marae.

Ka tāea te whakapaipai, whakatika whare rānei, ki ngā mārae kāore i te whakamahi hiko, ka riro ki a rātou he pūtea kia hoko i ētahi atu mea hiko pērā i te pungao kōmaru, mīhini hiko rānei me ētahi atu kaupapa hoki.

Ko te tekau mā iwa o tēnei marama te rā tuku tono whakamutunga.