E kati ana ngā tatau o te Mīra o Tachikawa

Mere McLean
  • Waikato/Te Waiariki

E noho whakatūpehupehu ana ngā kaimahi o te mīra rākau o Tachikawa i Rotorua nā runga i te poronga o o rātou tūranga mahi. 

I hui rātou mō te wā tuatahi whai muri i te putanga o tēnei kōrero ki a rātou i te mutunga o tērā wiki.  Kō atu i te kotahi rau, e toru tekau ngā kaimahi e noho ana ki te pōuri ināianei i a rātou e kimi ana i tētahi ara whakamua.

E kati ana ngā tātau o te mira o Tachikawa i te rangi nei i te kamupene e mau ana i te kākahu taratara.  

Nuku atu i te kotahi rau, rua tekau ngā kaimahi e noho tāwēwē ana.

Ko te hui tuatahi tēnei mā ngā kaimahi whai muri mai i te whakatau kua poroa o rātou tūranga mahi, e whakatūpehupehu ana ngā kaimahi nā runga i te āhua i puta ai te kōrero, ko ētahi i kite kē i runga i a pukamata.

Nō Hapanī ngā kaipupuri o Tachikawa, ā, ko te kōrero i te whai rātou i ētahi huarahi kia noho tūwhera tonu ai ngā tatau o tēnei kamupene.

Heoi anō, ehara i te mea he tauhou tēnei kamupene ki te poro turanga - e rua tau ki muri i pēnei tonu.  

Ko First Union te uniana kaimahi ki te mīra, ā, i te rangi nei i rere a rātou kōrero whakawhiti i te taha o ngā kaipupuri o Tachikawa.

Ka noho kati te mīra o Tachikawa kia puta rā anō he kōrero.  

Ka haere tonu ngā hui a ngā kaimahi hei te pō nei ki te kimi huarahi āwhina, tautoko hoki mō rātou i roto i ngā wiki e tū mai nei.