E kaha whakahē ana ngā mema pāremata o Aotearoa ki te rautaki kia aukatihia ētahi hapori o Ahitereiria

Heeni Brown
  • Ahitereiria

E ahu atu ana te aukatinga i ngā hāpori iwi taketake e koni atu ana i te kotahi rau o Ahitereiria ki Te Urupū, ā, he rautaki tēnei e tautokona e Pirimia Tony Abbott.

I tērā tau ko ngā iwi Māori o reira te takatū porotēhi ki waho atu o Pāremata, ā, i tēnei wiki koira ko te tautoko a ngā mema pāremata Māori o Aotearoa i a rātou.

Ehara hoki a Pirimia Tony Abbott i te manuhiri ki ngā hapori iwi taketake, engari ko ana kōrero mō rātou, tē aro i ngā rangatira iwi taketake.

I Kalgoolie a ia i tēnei wiki, ā, hei tāna e tautoko mārika ana ia i te kāwana o Te Urupū ki te whakakapi i te kotahi rau, e rima tekau hapori.

He rua rau rima tekau ngā hapori iwi taketake kei Te Uru.  He kainga ēnei mā te takiwa o te tekau mā rima mano tāngata.  Nā, kei tēnā, kei tēnā hapori tōna rima ki te rima rau tāngata te rahi, ā, ko te nuinga o ngā hapori kei te raki, kei Kimberly, te wāhi kua whakaritea e te kāwana kia kapi i te kotahi rau rima tekau hapori.

Ki Aotearoa nei, tā te mema pāremata mō Tāmaki Makaurau kōrero, horekau ia i te ohorere ki ngā hiahia a te Kāwana o Ahitereiria.

E ai ki a Peeni Henare, "Ki te tango ake, anā ko mātou, ana ko tātou te Māori te tauira ki te tango ake tātou mai i o tātou papa-kainga nā ka ngaro tātou ki roto i ngā tāone nunui kei te pērā ki roto o Ahitereiria mehemea e tū ana tēnei kaupapa o te pirimia."

Ā, e mea ana Te Pāti Māori, me tū tira mai ngā mema pāremata Māori ki te tautoko i ngā hapori iwi taketake nei.

Hei tā Marama Fox, “"He waimarie tā mātou kei ā mātou te Tiriti, karekau ō rātou Tiriti nā reira kei runga i te mananui noa iho tō rātou kaha ki te kōrero ka whai i ō rātou ake wawata.  Heoi anō, kei konei mātou hei tuara, hei tautoko i o rātou kōrero i ō rātou kārangaranga ki ō rātou pirimia."

Ahakoa ngā tautoko a ngā Māori o konei i ngā whakahē a ngā hapori iwi taketake o Te Papaka a Maui ki tō rātou pirimia, mea ana a Abbott, e mōhio ana a ia i te huarahi tika mō ngā iwi taketake o te whenua moemoea.