Kaupapa: Education

E kaha angitū ana a Hato Hohepa

Aroha Treacher
  • Waikato/Te Waiariki

Whaia te pae tawhiti kia tata, koia tā te kura kōhine Māori o Hato Hohepa e hāpai nei ki āna ākonga katoa.  Kei runga noa ake ngā māka o te kura i ngā taumata o te motu me ētahi kura tūmataiti. 

Ā, ko te katoa o ngā tauira pakeke o te kura, kua eke panuku i ngā whakamātautau NCEA.

He kura taumata toru te kareti o Hato Hohepa kei Taradale, ā, kua mōhiotia a ia mō te reo rōreka o ōna anahera.

Engari, nā a rātou whakatutukinga i ngā whakamātautau NCEA, kei runga ake o rātou māka ki ētahi kura tūmataiti, kei runga hoki i te pae mātauranga o te motu.

E ai ki ngā tatauranga, ko te katoa o ngā tauira mai i te tau tekau mā tahi tae noa atu ki te tau tekau mā toru kua eke panuku i te NCEA, he hua taiea i roto i ngā tau e rima kua hori.

O ngā tauira i te tau tekau mā tahi ki te tau tekau mā toru, katoa o rātou kua eke ki te pae tutuki, kei tua ake ā rātou māka i ērā o te motu.

O rātou i eke ki te pae tawhiti o taiea, kei runga ake hoki ā rātou māka i ērā o te pae mātauranga o te motu.

Ka tirohia ngā whakatauranga o ia kura a tērā tau, ka whakamanatia ngā panonitanga hei te rua mano tekau mā rima, kāore tēnei i te māharahara mā Hato Hohepa, na te mea, ka whaia pūmautia e rātou te iti kahurangi.