E hia rau ngā tāngata i whiwhi raihana nā te tautoko o tētahi māmā nō Pā Harakeke

Aroha Treacher
  • Te Tai Rāwhiti

Mō ngā tau e toru a Te Atakura Huata-Harawira nō Pā Harakeke, he māmā ia, tokorima āna tamariki, e tautoko ana ngā mema hapori, mo te aroha noa, ki te whiwhi raihana. I tēnei wā tonu nā tōna āwhina e toru rau ngā tāngata i whai mana ki te taraiwa waka.

I kite ia i ngā taumahatanga i roto te hapori, nā whai anō tā Te Atakura whakawhanake i te kaupapa Get Your License.

"Ko te utu tētahi o ngā tino taumahatanga, he mea pai ki te whai waka, heoi he mea nui rawa atu te whai waka e tika ana ki te taraiwa i te huarahi, kāore hoki he tautoko i kōnei ki te tautoko i te hunga pohara," tā Huata-Harawira.

He kaupapa e whakakahangia ai rātou ki te taraiwa i te huarahi, he kaupapa e tautokongia ana e te kaunihera o Heretaunga me te tari pirihimana o Pā Harakeke.

"He raru nui rawa atu mō te nuinga o ngā tāngata i kōnei kei te hiahia mātou ki te tautoko i te katoa."

Nā te maha o āna whaina, e hia mano nei te nui, i tipu ai te hiahia ki te whakatikatika i a ia anō kia whai raihana taraiwa waka.

"E mōhio pū ana ahau i aua tūāhuatanga me te kaikinikini o utu nama o te Tāhū o te Ture, he mea taumaha rawa ki te kite i te nui o te pūtea i tuku atu ki a rātou ia wiki, nā i whakaaro ake au me whakatikatika ahau i ahau anō."


Kua oti i aia te hōtaka kaiako taraiwa waka mō Aotearoa, i tēnei wā tonu e tāria ana te whakatau mō tāna tono.