Kaupapa: Politics

E hia mano kua whai wāhi ki te hikoi e whakahē ana i te TPPA ki Tāmaki

  • Tāmaki Makaurau

He tini mano tāngata puta noa i te motu i tū whakahē ki te whakaaenga Trans Pacific Partnership, he kawenata hokohoko ki waenga i nga whenua tekau ma rua i te Ao, ā ko Aotearoa tonu tētahi. Ahakoa te heke o te marangai i puta tonu te hunga poroteehi o Tamaki Makaurau ki te whiu i nga tao kupu ki te kāwanatanga kia kaua e herea ki te kawenata nei.

Ko te reo poroteehi tēnei e pāoro ana i nga tiriti, e whakahē ana i te whakaaenga TPP i waenganui i te Kāwanatanga o Aotearoa, me ngā whenua whai mana hokohoko nui o te ao.

Ki tā Marama Fox o te Pāti Māori, “Ka tāea e ngā rōpu nui, mahi nui, ohanga nui, te hari i tō mātou kawanatanga ki te kōti,  te mea nui me whakaatu kia matou ki Aotearoa whanui nei, nga mahi kei roto, tera pea he hua pai kahore matou i te mohio.”

Ā, he māharahara nui tēra i runga i te mōhio he taura here whanaunga kei waenga i te pāti Māori me Nāhinara, hei tā te Kaiarahi Takirua a Marama Fox, kāhore marika rātou o te Pāti Māori e tautoko ana i te whakaaenga nei.

Hei tāna, “He whakaaro ake tō mātou kia tāea te whakapuaki i te whakaaro a te Māori, koirā te take kei te tēpū mātou kia tāea te wero i te Kāwanatanga me te kī, kāhore mātou i te whakaae ki tēnei mea.”

A, he kohi moni te whai a tētahi Ahorangi Ture i te rā nei, kia ahei te kawe atu tetahi tono ki te kōti. 

E whai māramatanga atu ai te motu ki te tono, kīhai i mana i te Minita Hokohoko a Tim Groser i roto i ngā whakaritenga Official Informationa Act, kia kite ake i ngā kohinga kōrero mō te whakaaenga TPPA.

Ka mutu, kua whakarauika mai te tini ngerongero ki te tuku atu i tā rātou karanga, anā kia hikoi atu mai i tēnei whakaaenga TPPA.

Ko te porotēhī nei, tētahi noa o ngā porotēhi i whakahaerehia ki ngā takiwā maha puta noa i te motu.