Kaupapa: Weather

E haukerekere ana te huripari a Pam i te Tai Rāwhiti

Aroha Treacher
  • Te Tai Rāwhiti

He āwhina e tukuna ana e Aotearoa ki Whenuatū kua karawhiuwhiutia e huripari Pam, tōna whā tekau tāngata e whakapaetia ana kua mate. E toro atu ana te āwha ki te tairāwhiti o Te Ika-a-Maui i tēnei wā.

Horekau he tāngata ki ngā tiriti o Turanga anō nei he marae puehu, kua whakakapia ngā kura katoa, otira, he whā tekau ngā tāngata o rātou kainga i whakarerea, ā, kei te huri te aro o Rākau Whakamarumaru ki Uawa.

Whai muri i āna mahi turaki i te moutere o Vanuatu, he kōrero anō tō Huripari Pam.  Ka tau mai tana riri ki te takutai o Te Tai Rāwhiti.

He kotahi rau toru tekau kiromita i te hāora te kaha o ngā hau o Tawhirimatea, ka eke ki te iwa mita te teitei o ngā ngaru pukepuke ki te raki o Uawa. Tūturu, e haukerekere ana te huripari a Pam i te Tai Rāwhiti.

I wehe atu ngā tāngata i te whanga o Anaura, i Te Araora hoki ki Hinerupe Marae, ki ngā whanaunga kainga anō hoki.

I tae mai te ringa āwhina o Te Ope Katua mō te hunga o Waima te whanga o Tolaga nā te piki ake o ngā awa, nā rori i waipuke me ngā ngaru teitei i Waima.

Itiiti noa iho ngā tūkinotanga i rāngona, he rākau hinga, he tuanui anō i haea i Wharekāhika, me te aha, hei te pō rā anō te kaha o Huripari Pam ka mutu ki tēnei rohe, e ai ki ngā whakapae.