Ngā kaupapa: Kapa Haka, Te Matatini

E hanga ana Te Rūnanga o Ngāi Tahu i ētahi kiriata ipurangi hei whakaatu i ngā mahi whakarite o Te Matatini

Wepiha Te Kanawa
  • Te Waipounamu

"He kotahi whakatupuranga, ā, ka riro i a koe te hōnore ki te mau i Te Matatini." Koira tā Whetu Moataane nō Te Rūnanga o Ngāi Tahu kara mai. Koira hoki te take e hanga ana i ētahi kiriata ipurangi e whakaatu ana i ngā mahi whakarite o Te Matatini.

Ka tū te hui kapa haka nui rawa atu o te ao ki Ōtautahi, ā, ka āta kapohia ngā mahi whakarite katoa.

Hei tā Moataane, “Toru tekau tau ki muri nei, koinei te wā tautahi i tau mai nei Te Matatini ki runga i a mātou, ana te wā tuarua tēnei, nō reira rua tekau mā rima, toru tekau tau e heke mai nei ka hoki mai anō Te Matatini ki runga i a mātou. Nō reira ko te kaupapa nui o tēnei kiriata ipurangi, he taonga, he rauemi hei āwhina i ngā kaiwharite o taua rā, o taua whakataetae.”

I puta ake te tuatahi o ngā kiriata ā-ipurangi e rima i a Ngāi Tahu i tērā marama.

E ai ki a Moataane nō Te Rūnanga o Ngāi Tahu, ko te hangarau te huarahi e toro atu ia ki te iwi.

“Kei te noho tātou ki tēnei ao hangarau nei, nō reira koira tā mātou mahi o Te Rūnanga o Ngāi Tahu, ki te kōrero atu, kia tuku ngā momo kaupapa, ngā karere o te wā ki tō mātou iwi mā te ipurangi.”

Ko ngā pikitia ka purihia, kia hoki atu anō te hui ki Ngāi Tahu, e tau ai ngā mahi whakarite a taua wā.

Hei tā Moataane, “Ko te tino hiahia a te iwi nei kia hopungia ēnei o ngā kōrero, kia noho pūmau ki roto i tō mātou whare taonga, hei rauemi, hei taonga hoki mō o mātou uri whakatupu.”

Ka puta te kiriata ā ipurangi hōu i ngā wiki kei te heke mai. Ka whakaatu i ngā kapa haka e toru o Waitaha.