E arotakehia ana te Ture Whenua Māori

Aroha Treacher
  • Te Tai Hauāuru

Kua takaroa kē te aronga atu o te kāwanatanga ki te arotake i te Ture Whenua Māori. Koia tā tētahi kuia nō Te Māhia, tā Norma Whaanga, kua tekau mā iwa tau nei e pakanga ana kia noho tonu ki tōna kāinga, nō te tutūnga mai o te puehu i waenganui i te whānau mō te mana whenua e tū nei tōna whare.

Mo ngā tau whā tekau neke atu e noho ana a Norma Whaanga ki tōna kainga.

Heoi, i te wa i riro atu tōna hoa ki tua o Paerau, i tuki tōna rae ki te tarahiti o te whānau Whaanga, me te wero i tana noho ki tō rātou papakāinga.

Ki tā te tarahiti, e noho poka ana ia. I tukuna e rātou he reta ki aia me te whakamōhio atu ki te noho tonu ia, e hia mano tāra ka nama ki a ia mo te rēti.

Ko tā Whaanga, “kaore au i te pirangi ki te hāere ki rō whare herehere, kāore hoki au i te hiahia ngā nama te utu, otira, e kaha rangona e au ngā tautoko kia noho tonu au ki roto i tōku kainga”.

Na te papatoiake o te ture whenua Māori, i pau tōna kaha, no reira, kua riro ma tana tama ngā mahi e whakahāere.

Otira, mā te tirohanga hou i rewa i te Minita Take Māori Tuarua a Chris Finlayson, ka whakangāwaritia te ture, kia karo ai ngā ahuatanga penei i tēnei.

Ko te hiahia hoki a Finlayson kia puāwai ngā whenua Māori, ki te pēra, he toru piriona tāra ka whāngai ki te ōhanga Māori, hei te timatanga o tēra tau ka mana te hanganga ture hou.