E aro atu ana te Minita Take Mātauranga o Kotimana i ngā painga o te rūmakitanga

Wepiha Te Kanawa
  • Tāmaki Makaurau

I pōhiri ake te Kura a Rito o Newton i te Minita Mātauranga nō Kotimana a Michael Russell i te rā nei. Ko tana hiahia he rongo atu i ngā āhuatanga ako reo Māori, akomanga reo rua hoki o te kura nei.

Hei ko taana “Kua korero atu ahau ki ngā kaiwhakahaere o ngā whare wānanga, i tuku kōrero ahau ki ētahi ako o Otepoti, ā, i roto i aku kitenga he iwi whai hua te iwi o konei. Hikaka katoa ana au ki tēnei o ngā kura ako reo Māori.”

E arahi ana ia i tētahi ope nō Piritana ki tētahi hui-ā-ao mō ngā kaiako, ka tū ki Te Whanganui-a-Tara. Heoi ko tāna, e hiahia ana ia ki te whakahoki atu i ētahi mōhiotanga hōu ki tōna whenua taurikura.

Ko taana anō e mea nei “Ko te whakaora anō i ngā āhuatanga o te reo taaku e tino whai nei, tuturu, he hokinga tenei mā ngā iwi ki te tangata whenuatanga o tenei mea, te ahurea o te tangata. Me te rongo anō rā i ōna kakara pai.”

Ka pōhiri te Tumuaki o te kura o Newton a Hoana Pearson i te Minita me āna hiahia ki te whai kitenga hōu i roto i te taha ako reo rua.

Ko tā te tumuaki, tā Hoana Pearson “Mēnā ka mahi rerekē ka tipu ngā tamariki, ōrite ki tēnei te whenua, te ātaahuatanga o tēnei te whenua ka tipu ngā tamariki i roto i tēnā, ka tino mōhio rātou ka tū kaha i tērā ao.”

Āpōpō wehe atu ai te minita ki Te Whanganui-a-Tara, ki te timata i ngā whakaritenga mō te hui kaiako ka tū hei te Rāmere e kainamu mai nei.