Kaupapa: Tainui

E aro atu ana a Tainui ki te tau 2050

Te Kāea
  • Waikato/Te Waiariki

He rā he tō, he rā e ara mai anō, kei te ngana tonu a Waikato-Tainui ki te whakatinana i ngā manako mō te kaupapa whakatupuranga rua-mano-rima-tekau, mai i ngā mahi ngātahi-ā-pakihi nei, tae atu ki ngā hononga-ā-iwi, hononga-ā-Marae.

Tauira ai te tau, tau ariki te tau, tau pai te tau.

Ko tā Rāhui Papa, “He maha ngā tauwhanaungatanga kua oti te paihere a Waikato-Tainui ki ngētehi o ngā rōpu, tōrangapu mai, kawanatanga mai, iwi kainga mai, nō reira he mea tiritiri ki te whenua ngēra, kia tupu i roto i te tau tū mai nei.”

Ko te whakariterite i ngā ture me ngā mahi whakahaere o te whare tōrangapu o Waikato-Tainui, ara ko Te Kauhanganui tetahi o ngā mahi tuatahi mō te tau hou, nō te mutunga mai o tēra tau i tahuri te iwi ki te kaupapa a marae.

E ai ki a Rāhui Papa, “Tuatahi pea ko te whakangungu i te hunga kua tohua e ngō rātou marae i ki roto i tetahi ahuatanga whakatau mārire mai rā i o rātou ngakau ki roto i ngā mahi o te torangapu Māori nei i roto o Waikato-Tainui.”

Ko ngētahi whainga mō te tau rua-mano-tekau-mā-rima. Ko te eke o te kamupene o Tainui Group Holdings ki te piriona tara, te tirotiro ki ngā kereme o te tauwhanga moana i te uru, me ngā tuahuatanga mō te awa ka whaihia i roto i te tau hou.