Kaupapa: Tūhoronuku

E anga whakamua ana a Tūhoronuku

Heeni Brown
  • Te Tai Tokerau

Inapō puta te whakatau a te Minita Take Tiriti ki a Chris Finlayson rāua ko te Minita Take Māori ko Pita Sharples, e whakamana ana e rāua a Tūhoronuku hei rōpu motuhake ki te whiriwhiri i ngā kokoraho o te iwi nunui rawa o Aotearoa, ara o Ngāpuhi.

Koni atu i te rima tau e whai haere ana kia tohua ra ano ko wai ra hei kaiwhiriwhiri i ngā take tiriti o Ngāpuhi ki te Karauna.

He whakatau tēnei e anga mua rawa ai ngā mahi ki te tutuki i tētahi whakautanga e ea ai ngā nawe o mua. Engari ko te urupounamu nui mēna e whakaae katoa ana a Ngāpuhi nui tonu ki tēnei whakatau nui a te Karauna.

Haere atu ana ngā kaumatua o Ngāpuhi ki te wānanga i te whakatau nui a te Karauna,he mea anga mua i ngā hiahia o o te heamana o te Rūnanga ā Iwi o Ngāpuhi a Sonny Tau.

Hei tāna, “kua tae kē ngā matimati ki te korokoro i tēnei wā na hoino kia kutingia te kaki o te kāwana kia puta ai i tana pukoro i ngā tikanga e tika ana kia tukuna ki a Ngāpuhi.”

Kua mana a Tūhoronuku, te Kāhui rua tekau ma rua te rahi.

E taea te noho a ngā kaumatua e rua, ngā tūranga e whā mo te hunga noho taone, kotahi no te rūnanga.

Tekau ma rima no Te Whare Tapu o Ngāpuhi hei māngai mo ngā rohe o Hokianga, Kaikohe-Waimate Taiämai, Whangaroa, Te Pewhairangi me Whangarei ki Mangakahia.

Ko tā Pita Tipene o Te Kotahitanga o ngā Hapū o Ngāpuhi, “e kore e tāea tētahi komiti i nga hapū e korero, kua roa kē ratou e tinihanga ana i ngā tāngata o Ngāpuhi, e teka ana ki ngā iwi o Ngāpuhi i te taha o te Karauna. i te mutunga he kaupapa tēnei e rite ai ngā hiahia o te Karauna.”

Kotahi rau mā iwa ngā hapū e korerotia ana, ka tohua ko ētahi ki ngā tūranga kaumatua,noho taone me te tūranga rūnanga.

Ka tohutohu ki ngā hapū rōpu me ngā hapū kaikorero, ka piki ano ai ki a Tūhoronuku, heke rawa mai ko te tuku ripoata ki ngā hapū rōpū, otira ki ngā hapū katoa.

Ko te otinga iho, e toru ki te ono ngā kaiwhiriwhiri ka āhei te tūhono ki te Karauna.

Ko tā Tipene. “kei roto i te reta tēna wāhanga e mea ana e ngā hapū o Ngāpuhi ka taea e koutou te wehe mai i a Tūhoronuku mēnā ko ia tēna to koutou hiahia anei paia atu.”

Kua rewa a Tūhoronuku ki te rere, engari e hoki ana a Pita Tipene ki Te Kotahitanga o ngā Hapū o Ngāpuhi ki te whakatau pēna rānei ko te kōti, ko te porotēhi rānei te anga mua mo ratou.

Horekau ano kia whakatau a hea ka tuwhiri i ngā mema ka tohua ki te rōpu motuhake hou o Tūhoronuku.

Engari e ai ki a Finlayson rāua ko Sharples ka āhei ngā uri katoa o Ngāpuhi ki te pōti i ngā māngai ka noho ki te taumata hou, ki te taumata whai mana o Tūhorunuku.