Kaupapa: Elections

E ai ki ngā tatauranga kei mua te ihu a Nanaia Mahuta me te Pāti Reipa mo Hauraki-Waikato

  • Waikato/Te Waiariki

Ko te reo Māori tērā e noho matua ana ki ngā kai-pōti o te rohe o Hauraki-Waikato, whai muri i te mātauranga, te tūkino ā-whānau, ngā tamariki noho pōhara, ngā utu ora me te kore mahi o ngāi Māori.

Koinei ngā hua o te rangahau tatau pōti o te wā a Whakaata Māori e tohu ana hoki, ko wai rā e kaha hiahiatia ana e te rohe pōti hei pīkau i ēnā take i roto i te kāwanatanga e haere ake nei.

Ki te tū te kōwhiringa āpōpō, ko te nuinga o ngā pōti ā-pāti ka riro i a Reipa. E whā tekau mā whā ōrau o te hunga i rangahaua e aro ana ki a Reipa hei kāwanatanga.

Ko Te Pāti Māori anō tērā e noho tuarua mai ana, ā, ko Nāhinara e whai tata atu ana i runga i te tekau mā toru ōrau.  

He tekau mā tahi ōrau te tautoko ki a Ipurangi MANA, ā, he tatau kotahi te wehenga ki waenga i Ngā Kākāriki me Aotearoa Tuatahi e noho nei i runga i te waru ōrau.  

He kotahi ōrau noa te tautoko ki ngā Conservatives

E rima tekau mā whitu ōrau o ngā kai-pōti i uia ka tuku pōti ki te mema o te wā, ki a Nanaia Mahuta o Reipa.

Kei mua noa atu ia e ārahi ana i te kai-tono hōu o Te Pāti Māori, i a Susan Cullen o Te Pati Māori e noho tuarua mai ana, kātahi ko Angeline Greensil o MANA.