Kaupapa: Rena

E ai ki ngā iwi kāre he kiko o te pūrongo hou e pā ana ki te kaipuke o Rena

Mere McLean
  • Waikato/Te Waiariki

Kāre he kiko o te pūrongo a te kōmihana tirotiro aitua waka mo te ūtanga o te kaipuke Rena ki Otaiti, koinei te whakahoki a ngā iwi. I whakaterea te pūrongo ki Tauranga moana i te ahiahi nei me tāna na ngā kaimahi tauā kē te raru mo te ūtanga o te kaipuke.

Ka noho ki te pae o mahara te ūtanga o te kaipuke RENA i te tau rua mano, tekau mā tahi, whā tau whai muri  kua whakaputahia e te kōmihana tirotiro aitua waka i to rātou pūrongo na te aha ai i ū te Rena i waho atu o Tauranga moana.

E ai ki a John Marshall, “E rua ngā take i whakaaro mātou kia tū tēnei hui ki Tauranga i te rā nei, tuatahi kia whakakanohi te mahi a te kōmihana me te whakaaro ki ngā hapori me rātou i raru na te ūtanga o te Rena.”

Ko tā te pūrongo nō ngā kaimahi te hē mo te ūtanga o te Rena na to rātou kore whai tikanga mahi ki roto i ngā kaupapa whakahaere, arahi waka me te whakahaere tonu i te kaipuke. 

Ko tā Charlie Tawhiao, heamana o Te Rūnanga o Ngāi Te Rangi i mārama te kite i tērā ahuatanga ki roto i te pūrongo engari he aha ngā akoranga kua puta.

Ki tā Tawhiao, “He maha hoki ngā kino kei muri i a rātou, ā, ko te mea tuatahi kāre te kawanatanga i te tino mōhio kei hea ngā kaipuke kei runga i ngā moana, tata atu ki Aotearoa.”

Kua ea ki te taha o te kāpene me te kāpene tuarua, engari i kite hoki te kōmihana kāre he raru i puta ki te taha mīhingi me ngā ahuatanga ārahi o runga o te Rena, ā, ēhara tērā i te take i ū te waka, engari ko tā te iwi ko ngā raru whai muri i te ūtanga o te waka ngā take nui.

Hei tā Joe Harawira, “Ngā rangi mōrearea kei roto kē i ētahi o ngā pouaka kei roto taua wāhanga o te poti rā kei reira te tino kiko mōku me kī.” 

Ko Tawhiao tērā e mea ana, “Kāre e kore, ko te kōrero whakamutunga kei a tātau kia hiki atu te tūpaapaku i runga o Otaiti me ōna para katoa kia wehe atu, kia hiki atu ki wāhi kē.”

Mai te pūrongo a te Kōmihana tirotiro waka aitua e rua ngā tauwhainga i puta ki te rere moana o Aotearoa, kia whakatakoto i ngā ara kaipuke me whakatakoto tohu māharahara huri noa i a Aotearoa.